Elordada koronavirýspen kúresip júrgen dárigerlerdi qoldaýǵa 1,5 mlrd teńge bólindi. Bul týraly «Habar-24» telearnasynyń tikelei efirinde Nur-Sultan qalasynyń ákimi Altai Kólginov aitty, dep habarlaidy QazAqparat.
«Bizdiń basty mindetimiz - naýqas adamdardy der kezinde anyqtaý. Sondyqtan qazirgi ýaqytta testileýden ótetin azamattardyń sanyn kóbeittik. Eger tótenshe jaǵdai bastalǵan alǵashqy kúnderi bizde 1 zerthana jumys istese, qazirgi ýaqytta 5 zerthana jumys istep tur. Kúndelikti 3 myń adamǵa testileý júrgizilýde. Bul eń aldymen azamattarymyzdy barynsha testileýden ótkizip, qaýipsizdik sharalaryn qabyldaýǵa kómegin jáne septigin tigizýde. Sonymen birge Prezidenttiń tapsyrmasyna sáikes, dárigerlerdiń qaýipsizdigin qamtamasyz etý úshin birqatar is-shara qabyldadyq», - dedi ol.
Máselen, onyń atap ótýinshe, tótenshe jaǵdaidyń alǵashqy kezeńinde pnevmoniia nemese JRVI belgisi bar azamattar qalanyń kez kelgen emhanasyna nemese aýrýhanasyna baryp tekserile alatyn. Al bul eń aldymen dárigerlerge qaýip tóndirdi. Virýs juqytyryp alǵan dárigerlerdi karantinge jatqyzýǵa týra keldi. Osydan keiin pnevmoniia diagnozy bar azamattarǵa tek bir aýrýhana — temir jol aýrýhanasy belgilendi. JRVI nemese dene qyzýy bar adamdarǵa №2 emhana ǵana qyzmet kórsetti. Tótenshe jaǵdai rejimi bitkennen keiin elordanyń barlyq 14 emhanasynda arnaiy bólek esik ashylyp, sol jerde JRVI nesese basqa da aýrý belgileri bar azamattardy dárigerler qabyldai bastady.
«Bul sharalardyń arqasynda 150-ge jýyq virýs juqtyrǵan adamnyń basqa aýrýhanalarǵa barýyna jol bermedik. Iaǵni, dárigerlerimizdi jáne basqa da azamattardy qorǵap qaldyq. Virýs anyqtalǵan ol azamattar qazirgi ýaqytta emdelip shyqty. Sonymen birge Prezidenttiń tapsyrmasyna sáikes, osy indetpen kúresip júrgen dárigerler memleket tarapynan qomaqty qoldaý alyp otyr. Qazirgi ýaqytta karantinde jumys jasap jatqan, aýrýhanalarda virýs juqtyrǵan azamattardy emdep júrgen 4 myńǵa jýyq dárigerge 1,5 mlrd teńge bólindi», - dedi Altai Kólginov.
