QR Densaýlyq saqtaý ministrliginde koronavirýs pandemiiasymen kúreste eńbegimen erekshelengen meditsina qyzmetkerlerin «Halyq alǵysy» medalimen marapattaý saltanaty ótti. "Ult aqparat" bul týraly vedomstvonyń Facebook-tegi paraqshasyna silteme jasap habarlaidy.
Densaýlyq saqtaý salasynda jemisti eńbek etip júrgen Qazaqstan azamattaryn yntalandyrý úshin QR Prezidentiniń 2020 jylǵy 8 maýsymdaǵy № 348 Jarlyǵyna sáikes «Halyq alǵysy» medali taǵaiyndaldy. Sondai-aq Memleket basshysynyń 2020 jylǵy 19 maýsymdaǵy № 353 Jarlyǵymen QR Densaýlyq saqtaý ministrligi boiynsha marapattalatyn 29 adamnyń tizimi bekitildi.
«Qurmetti áriptester, densaýlyq saqtaý júiesine úlken júkteme túsip otyrǵan – koronavirýs infektsiiasynyń taralýy qarqyn alǵan qazirgi kezeńde kúndelikti tabandy ári batyl eńbekterińiz úshin bas iip, alǵys aitamyz», - dedi vitse-ministr Lázzat Aqtaeva.
Birinshi kezekte medal Qaraǵandy oblysynyń sanitarlyq qyzmeti Buqar jyraý aýdandyq basqarmasynyń bas mamany marqum Baqbergen Saǵymqojauly Aijigitovtiń týystaryna tapsyryldy. B.Aijigitov indetpen kúreste aldyńǵy shepte eńbek etken maman.
Sonymen qatar, medalmen marapattalǵan, qazir elimizdiń barlyq óńirinde koronavirýspen kúreske jumyldyrylǵan meditsina qyzmetkerleriniń aty-jónderi ataldy.
Onyń ishinde medaldi bas infektsionist Dinagúl Baesheva aldy. Sondai-aq tizimde KVI-ge shaldyqqandardy emdeý hattamasynyń avtorlarynyń biri - Astana meditsina ýniversitetiniń klinikalyq jumystar jónindegi prorektory Baqyt Kósherova bar.
Shara sońynda meditsina qyzmetkerleri COVID-19 pandemiiasymen kúreste eńbekterin joǵary baǵalaǵany úshin Prezident Qasym-Jomart Toqaevqa jáne Densaýlyq saqtaý ministrliginiń basshylyǵyna alǵys bildirdi.
