Qytaidyń Shyńjan-Uiǵyr avtonomdy aýdanynan 10 dáriger Qazaqstan astanasyna keldi, dep habarlaidy QazAqparat.
Delegatsiiany QR Densaýlyq saqtaý vitse-ministri Kamaljan Nadyrov kútip aldy.
«Búgin qytailyq áriptesterimizdi qarsy aldyq. Bul kezdesý eki el basshylarynyń ýaǵdalastyǵy aiasynda ótýde. Biz úshin bul kezdesý sózsiz mańyzdy, sebebi Qytaidyń epidemiologiia máselelerindegi emdeý tájiribesi men zertteýleri mańyzdy bolyp otyr. Qytaidan 10 dáriger arnaiy keldi, olardyń arasynda pýlmonolog, epidemiolog mamandar, qoǵamdyq densaýlyq saqtaý sarapshylary bar. 15 kúndik issaparda olar koronavirýs infektsiiasyn juqtyrǵandardy diagnostikalaý, emdeý jáne qoǵamdyq densaýlyq saqtaý máselelerin talqylaidy», - dedi vitse-ministr tilshilerge bergen suhbatynda.
Baǵdarlama aiasynda qytailyq dárigerler Nur-Sultan, Qaraǵandy, Almaty qalalaryna barady.
«Bizde bul syrqattan jazylyp, aýrýhanadan shyqqan turǵyndar bar. Sonymen birge, aýyr halde jatqan azamattarymyz da bar. Birqatary ókpeni jasandy jeldetý apparattarynda jatyr. Sondyqtan, áriptesterimizben talqylaityn másele kóp. Bizde bul aýrýdy diagnostikalaý men emdeýdiń klinikalyq hattamasy bekitilgen. Bul hattama úzdik halyqaralyq tájiribelerge sai keledi. Áriptesterimizdiń de tájiribesin zerttep, ózimizge paidaly derek alarymyzǵa senimdimin», - dedi K. Nadyrov.
Sonymen birge, Qazaqstandaǵy QHR elshisi Chjan Siao dárigerlerdiń tájiribeli, joǵary bilikti maman ekenin atap ótti.
Qazaqstanda pandemiiaǵa qatysty kúrdeli jaǵdai oryn aldy. Ókinishke qarai, virýs juqtyrǵandardyń sany artyp keledi. Qytaidyń Shyńjan-Uiǵyr avtonomdy aýdanynan kelgen dárigerler de osy indetpen kúresip, kóptegen naýqastardy emdep jazǵan. Bul aýrýdyń soqqysy alǵash ret Qytaiǵa tidi. Búginge deiin virýspen kúresý boiynsha birqatar tájiribe jinaqtadyq. Áli kúnge deiin bul virýs - biz úshin jańa, ol týraly bilerimiz az. Biraq, qazaqstandyq dostarǵa da aitarymyz bar. Koronavirýspen kúres boiynsha tájiribe bólisýge daiynbyz», - dedi elshi.
Qazaqstanǵa arnaiy kelgen dárigerlerdiń aitýynsha, Qytai koronavirýspen úsh ai kúresti.
«Biz Qazaqstanǵa tas-túiin daiyndyqpen keldik. Bizdiń maqsatymyz - infektsiiamen qalai kúreskenimizdi kórsetý. Barlyǵymyzdyń tájiribemiz bar, Shyńjanda koronavirýspen kúreskenbiz. Bizdiń ekijaqty yntymaqtastyǵymyz nyǵaia túsedi dep oilaimyn», - dedi shyńjandyq dáriger Lý Chjen.
