Koronavirýspen kúreske jumyldyrylǵan meditsina qyzmetkerlerine tiesili ústemaqyny tóleý kezinde jemqorlyqqa boi aldyrǵan biraz sheneýnik jazaǵa tartyldy. Bul týraly QR Sybailas jemqorlyqqa qarsy is-qimyl agenttiginen málim etti, dep habarlaidy "Ult aqparat".
Máselen, Taldyqorǵan qalasyndaǵy áskeri gospitaldiń bastyǵy Kólbaevqa Almaty garnizony áskeri sotynyń úkimimen 2 jylǵa bas bostandyǵynan shekteý jazasy berildi. Ol gospitaldiń aǵa medbikesi, serjant Azimahýnovanyń deldaldyǵymen meditsinalyq mekemege jumysqa turǵan Qasanǵalievten 1 mln teńge nemese meditsinalyq járdemaqynyń 50 paiyzyn para retinde alǵany úshin aiyptaldy.
Al Jambyl oblysynda aýdandyq aýrýhanalardyń biriniń basshysyna qatysty pandemiiamen kúreske jumyldyrylǵan aýrýhana qyzmetkerlerine tiesili 2,7 mln teńgeden alym-salyq jinaý faktisi boiynsha sotqa deiingi tergeý júrgizilip jatyr.
Shymkent qalasyndaǵy meditsinalyq mekemeniń laýazymdy tulǵasyna qatysty da virýs juqtyrý táýekeli joǵary topqa jatpaityn qyzmetkerlerge 50 mln teńgeden astam ústemeaqy tólegeni úshin is qozǵalyp otyr.
Qyzylorda oblysynda da aýdandyq aýrýhanalardyń meditsina qyzmetkerlerine 12 mln teńgeden astam negizsiz ústemeaqy tóleý faktisi boiynsha tergeý júrgizilýde.
Aqtóbe oblysynda da meditsinalyq ústemeaqy tóleý barysyndaǵy zańsyzdyqtar boiynsha memlekettik aýdit materialdary oblys ákimdigine shara qabyldaý úshin jiberilgen. Nátijesinde Hromtaý, Muǵaljar, Alǵa, Mártúk, Shalqar aýdandyq aýrýhanalarynyń, Aqtóbe meditsinalyq ortalyǵynyń bas dárigerleri men meditsina qyzmetkerleri tártiptik jazaǵa tartyldy.
