AQSh Kongresiniń koronavirýs juqtyrǵan múshesi óz diagnozyn Kapitoliige shabýylmen bailanystyrady. Ulybritaniia biligi karantin talabyn buzatyndarǵa qatań sanktsiialarmen eskertý jasaýda. Al Amerikanyń haiýanattar baǵynyń birinde koronavirýspen alǵash ret gorillalar aýyryp qaldy. Álemdegi osy jáne ózge de jańalyqtar týraly VVS habarlady.
Djons Hopkins Ýniversitetiniń málimetteri boiynsha, pandemiia bastalǵaly álemde 91 millionǵa jýyq adam koronavirýs juqtyrdy, onyń ishinde 1,9 millionnan astamy qaitys boldy. Naýqastar sany jaǵynan AQSh, Úndistan, Braziliia, Resei jáne Ulybritaniia aldyńǵy bestikte tur. Ólim deńgeii boiynsha da osy elder aldyńǵy qatarda, tek Reseidiń ornyna – Meksika.
Jaýapsyz londondyqtar
London politsiiasynyń basshysy Kressida Dik Times gazeti arqyly tótenshe sharalar qabyldaýǵa májbúr bolatynyn jáne karantin rejimin buzýshylarǵa jappai aiyppul salýǵa týra keletinin eskertti. Onyń aitýynsha, Londonda kópshilikke arnalǵan zańsyz keshter jáne úidegi oiyn-saýyqtar tyiylmai otyr.
Ótken táýlikte Ulybritaniiada koronavirýstyń 46 myńnan astam jańa jaǵdaiy anyqtaldy, 529 adam qaitys boldy. Eldegi aýrýhanalarda koronavirýs diagnozymen 32,2 myń patsient jatyr. Londonda qazir eń qiyn kezeńderdiń biri.
Kressida Dik óz úndeýinde mundai statistikaǵa qaramastan, adamdar áli de biliktiń nusqaýlaryn buzyp otyrǵanyn alǵa tartty.
Ulybritaniia syrqattaný men ólim-jitim kórsetkishteri eń joǵary bes eldiń qataryna kiredi: sáikesinshe 3,1 mln jáne 82 myń. 2020 jyly elde jalpy ólim-jitim 697 myń adamdy qurady. Bul, Ekinshi dúniejúzilik soǵystan keiin bolǵan eń joǵary kórsetkish.
Densaýlyq saqtaý ministri Mett Henkok seisenbide NHS-qa túsken (Ulybritaniianyń Ulttyq densaýlyq saqtaý júiesi) júktemeniń shegine jetkenin eskertti jáne britaniialyqtardy airyqsha qajettilik bolmasa, úiden shyqpaýǵa shaqyrdy.
Eýropa: jaǵdai jeńildegen joq
Bild nemis tabloidynyń aqparatyna sáikes, Germaniia kantsleri Angela Merkel eldegi qatań lokdaýndy taǵy 8-10 aptaǵa uzartýǵa nietti. Basylymnyń málimetinshe, ministrler kabinetimen kezdesýde Merkel «britandyq virýsqa» (Ulybritaniiada alǵash ret tabylǵan koronavirýstyń jańa túri) qarsy sharalar qoldanylmasa, Germaniiada Pasha meiramyna qarai infektsiianyń jańa tolqyny júrýi yqtimal ekendigin málimdedi. Ótken 24 saǵat ishinde elde taǵy 891 adam qaitys bolyp, 12,8 myń naýqas anyqtaldy.
Portýgaliianyń 72 jastaǵy Prezidenti Marsel Reber de Soýzaǵa koronavirýs diagnozy qoiyldy. Onyń bilik etý merzimi jaqynda aiaqtalady. Ol syrqattanýyna bailanysty sońǵy kezdesýler men is-sharalardan bas tartýǵa májbúr boldy. 24 qańtarda elde sailaý ótedi jáne qazirgi ýaqytta kandidattardyń sailaýaldy naýqany júrip jatyr. Jýyrda de Soýza men onyń qarsylastary teledebattarǵa qatysqan bolatyn.
Eýropalyq odaqtyń farmatsevtikalyq rettegishteri 29 qańtarda AstraZeneca/Oxford vaktsinasyn qoldanýdy maquldaýy múmkin.
AQSh Kongresindegi búlikten keiingi kovid
Niý-Djersi kongressmeni Bonni Ýotson Koýlmen óziniń paraqshasynda koronavirýsqa taasyrǵan analizi oń shyqqanyn jáne ony 6 qańtarda Kapitoliidegi tártipsizdiktermen bailanystyratynyn jazdy. 75 jastaǵy Koýlmenniń aitýynsha, ol indetti Kapitoliide búlik shyǵarǵan adamdardan juqtyrǵan.
Donald Tramptyń jaqtastarynyń basym kópshiligi maskasyz bolǵandyqtan, Koýlmen áriptesterimen birge alysyraq kabinetterde jasyrynýǵa májbúr bolǵan.
AQSh álemde virýs juqtyrǵandar men ólgender sany boiynsha kósh bastap keledi – sáikesinshe 22,6 million jáne 376,2 myń.
Amerikanyń haiýanattar baǵynda gorillalar aýyryp qaldy
San-Diegonyń safari baǵynda segiz gorilla koronavirýs juqtyrdy. Bul álemdegi haiýanattar baǵynda primattarda Covid-19-dyń rastalǵan alǵashqy jaǵdaiy. Keibir gorillalarda simptomdar, jótel bar, biraq olardyń arasynda aýyr naýqastar joq. Koronavirýsqa testiń oń nátijesi tek bir maimylda shyqqan. Alaida barlyq segiz janýar virýs juqtyrǵan bolýy múmkin. Gorillalar koronavirýsty olardy kútýshi adamnan juqtyrǵan dep boljanady.
Álemde taǵy ne bolyp jatyr
Malaiziia koroli ál-Sultan Abdýlla II epidemiologiialyq jaǵdaidyń kúrt nasharlaýyna bailanysty elde tótenshe jaǵdai jariialady. Korol saraiynyń resmi habarlamasynda aitylǵandai, ol 1 tamyzǵa deiin jalǵasady. Eger infektsiianyń taralýy aitarlyqtai tómendese, TJ rejimi erterek toqtalýy múmkin.
Tótenshe jaǵdai rejimi elde sońǵy 50 jylda alǵash ret engizilip otyr. Mundai sharany engizýdi osy laýazymdy bir jyl buryn atqarǵan premer-ministr Mýhiddin Iasin usynǵan bolatyn.
Djons Hopkins Ýniversitetiniń málimeti boiynsha, Malaiziiada pandemiia kezinde 138,2 myń adam aýyryp, 555 adam qaitys boldy.
Seisenbide Qytai biligi Beijińge jaqyn aýdandarda qosymsha karantin sharalaryn engizdi. Atap aitqanda, lokdaýn jariialanǵan aýmaqtarda Hebei provintsiiasynyń 4,9 million halqy turady. Olardyń barlyǵy jaqyn kúnderi Covid-19 synaqtarynan ótýi kerek.
Livan 11 kúnge táýlik boiy komendanttyq saǵat engizedi. Jergilikti ýaqyt boiynsha beisenbi kúni tańǵy saǵat 5-ten bastap livandyqtar, tipti tamaq alý úshin de kóshege shyǵa almaidy. Barlyq satyp alýlar jetkizý qyzmetteri arqyly júzege asyrylady. Kóshege shyǵýǵa tek tótenshe jaǵdailar qyzmetkerleri men júrgizýshilerge ǵana ruqsat beriledi.
