Qazaqstanda koronavirýstyń taralýyna jol bermeý jónindegi vedomstvoaralyq komissiia óz Telegram-kanalynda indetke qatysty álemdegi ahýal týraly málimet usyndy, dep habarlaidy "Ult aqparat"
Shveitsariia karantin talaptaryn jeńildetti. Elde meiramhanalardyń ishki jailary ashylyp, aýditoriialardaǵy stýdentter sany boiynsha shekteýler alynyp tastaldy. Sondai-aq, shekteýler engizilgen salalar úshin qashyqtan jumys rejimi joiyldy. Alaida Bern biligi jumys berýshilerge qyzmetkerlerdiń úiden jumys isteýine múmkindik berýdi usynady. COVID-19-ǵa qarsy vaktsinany alǵan el turǵyndary epidemiologiialyq qaýip deńgeii joǵary elderden oralǵannan keiin oqshaýlanýǵa mindetti bolmaidy.
Qytaidyń ońtústiginde koronavirýs infektsiiasyn el ishinde juqtyrý jaǵdailary artty. Gýandýn provintsiiasynda ótken táýlikte infektsiiaǵa 20 adam shaldyqqan. Oqiǵalardyń 18-i Gýanchjoý ákimshilik ortalyǵynda anyqtalǵan. Sonymen qatar, provintsiiada koronavirýs infektsiiasynyń asimptomatikalyq aǵymynyń úsh jaǵdaiy tirkeldi.
Germaniiada KVI taralý deńgeii tómendep keledi. Infektsiiany juqtyrǵandar kórsetkishiniń kúndelikti ósimi 1 978 jaǵdaidy qurady. Bul bir apta burynǵy kórsetkishke qaraǵanda 704 jaǵdaiǵa kem. Pandemiia bastalǵannan beri halqynyń sany 84 milliondy quraityn Germaniiada koronavirýstyń 3 681 126 oqiǵasy anyqtaldy. Indetten 88 442 adam kóz jumdy. Sońǵy 7 kúnde 100 000 turǵynǵa shaqqanda infektsiiany juqtyrýdyń 35,1 jaǵdaiy tirkeldi.
Sondai-aq Germaniiada pandemiia bastalǵannan beri koronavirýsty juqtyrýdyń birde-bir jaǵdaiy tirkelmegen aýyl anyqtaldy. Ol - eldiń batysyndaǵy Reinland-Pfalts jerinde ornalasqan 400 turǵyny bar Lig aýyly. Onda 14 ai boiy koronavirýs indeti tirkelmegen.
Bakýde metro qaita jumys istei bastady. Ázerbaijan biligi búginnen bastap astanadaǵy metropolitenniń jumysyn qaita jandandyrdy. Baký metrosy jolaýshylardy 2020 jyldyń qazanynan beri qabyldaǵan joq. Karantindik sharalardyń álsireýine qaramastan, metro basqa da qoǵamdyq kólikter siiaqty demalys kúnderi jumys istemeidi. Al, 10 maýsymnan bastap elde meshitter men hramdar kelýshiler úshin esigin ashady.
Resmi Kair karantin talaptaryn jeńildetedi. Mysyr biligi dámhanalar, meiramhanalar, dúkender men saýda ortalyqtarynyń jumysyna qoiylǵan shekteýlerdi alyp tastaý týraly sheshim qabyldady. Erteńnen bastap tamaqtaný oryndary men dúkender jazǵy jumys rejimine oralyp, túngi saǵat 00:00 deiin jumys istei alady. Mysyrlyq úkimet shekteýlerdi jeńildetýmen qatar, Hýrgada men Sharm-esh Sheih siiaqty týrister arasynda eń tanymal eki kýrorttyń barlyq turǵyndaryn vaktsinalaýǵa nietti ekendigin habarlady.
Ońtústik Koreiada halyqtyń 10,5% Sovid-19-ǵa qarsy egildi. Ótken táýlikte ǵana elde 163 457 adam vaktsinalandy. 30 mamyr saǵat 00:00-degi jaǵdaiǵa sáikes, elde 5 399 015 adam ekpeniń alǵashqy dozasyn alǵan. Egilý deńgeii 10,5% qurady.
Japoniia biligi koronavirýs infektsiiasyna tapsyrylǵan PTR-test anyqtamasy bolǵan jaǵdaida jankúierlerdi Tokioda ótetin Olimpiada men Paralimpiada oiyndaryna kirgizýge nietti. Ekpe saldyrǵan azamattar da tiisti qujatty usynýy shart.
PTR-zertteý stadionǵa kelgenge deiin jeti kún buryn jasalýy kerek.
Stadionǵa kirer aldynda mamandar kórermenderdiń temperatýrasyn tekserip, betperdeniń bolýyn qadaǵalaidy.
Al Olimpiadadaǵy jankúierlerdiń sanyn shekteýge qatysty másele maýsym aiynda sheshiletin bolady.
