Koronavirýsqa qarsy jyl saiyn jańa vaktsina alyp otyrý kerek. Bul týraly S.D. Asfendiiarov atyndaǵy qazaq ulttyq meditsinalyq ýniversitetiniń juqpaly jáne tropikalyq aýrýlar kafedrasynyń professory, meditsina ǵylymdarynyń doktory Ravilia Egemberdieva onlain brifing barysynda aitty, dep habarlaidy QazAqparat.
Onyń aitýynsha, koronavirýs jyldam mýtatsiialanyp jatyr. Soǵan bailanysty jańa ekpeler jasalyp otyrýy kerek.
«Koronavirýspen aýyrǵan adamda 2-8 aiǵa deiin jetetin antidene túziletini aitylyp jatyr. Al vaktsina alǵandarda antidene 6 aidan 1 jylǵa deiin jetedi. Vaktsinany salǵanda adam aǵzasy ol virýspen tanysady jáne oǵan qarsy antidene túzip, qorǵanysh qabileti paida bolady. Keiin virýs juqqanda ol qorǵanysh jasýshalary birden oǵan shabýyl jasap, oǵan qarsy turady. Nemese aýyrý jeńil ótedi. Alaida koronavirýs mýtatsiialanyp, jańa shtamdary paida bolyp jatyr. Burynǵy antideneler oǵan qarsy tura almaidy. Ol úshin jyl saiyn jańa shtamǵa qarsy turatyn vaktsina jasaý kerek», - deidi ol.
Sonymen qatar, ol virýsqa qarsy immýnitet qansha ýaqytqa deiin saqtalatynyn dóp basyp aitý qiyn ekenin jetkizdi.
«Ujymdyq immýnitet qalyptassa, infektsiia ózdiginen joǵalady deý qate. Virýs báribir aramyzda qalady. Tek jeńil ótip jáne ólimge ákelmeýi múmkin. Qazir mamandardyń eshqaisysy virýsqa qarsy immýnitet qansha ýaqytqa deiin saqtalatynyn dóp basyp aita almaidy. Sondyqtan qosymsha vaktsina qajet bolady», - dedi Ravilia Egemberdieva.
Spikerdiń pikirinshe, virýstardyń mýtatsiialanýy tabiǵi qubylys, jer sharyndaǵy barlyq tiri aǵzanyń jetilýinde bolatyn jaǵdai.
«Virýstar ózdiginen tirshilik ete almaidy, ary qarai ómir súrý úshin qojaiynnyń aǵzasy kerek. Sondyqtan olar árdaiym evoliýtsiialyq áserge ie. Adamnyń immýndyq júiesi qozdyrǵyshtarǵa qarsy kúreste túrli ádiske barady. Qojaiyn aǵzasynyń virýstarǵa qarsy turatyn basty ádisi antidene túzý. Antidene adam aǵzasyndaǵy jasýshalardy virýstyń enip ketpeýinen qorǵaidy. Olar qandai da bir virýs shtamynyń enip ketpeýine qorǵan bolady», - deidi professor.
