Maman «koronavirýsqa qarsy ekpeni májbúrli túrde salady» degen qaýesetke qatysty jaýap berdi, dep habarlaidy QazAqparat.
Ortalyq kommýnikatsiialar qyzmetindegi baspasóz máslihatynda vaktsina saldyrý erikti tártipti júrgizilse de, keibir adamdar «koronavirýsqa qarsy ekpe májbúrli túrde salynady» dep alańdaýly ekeni aityldy. Osy oraida turǵyndardyń mundai jaǵdaiǵa tap bolýy múmkindigi suraldy.
«Budan buryn habarlanǵandai, vaktsinalaý erikti túrde bolady. Osy oraida májbúrleý degen bolmaidy jáne vaktsina almaǵan azamattarǵa qarsy eshqandai sanktsiia qarastyrylmaǵan. Buǵan jol berilmeidi. Birinshi kezekte vaktsina adamnyń ózin qorǵaý úshin qoiylady. Sondyqtan ol ár adamnyń jeke sheshimi. Jeke óz basym infektsiiadan qorǵalǵym keledi», - dedi Nur-Sultan qalasynyń qoǵamdyq densaýlyq saqtaý basqarmasynyń basshysy Timýr Muratov.
Buǵan deiin ol vaktsina alǵanyn aitqan bolatyn. Osy oraida koronavirýstyń saldaryn árbir adam ózi baǵalaýy kerektigin atap ótti.
Óz kezeginde QR DSM «Qoǵamdyq densaýlyq saqtaý ulttyq ortalyǵy» ShJQ RMK «Sanitariialyq-epidemiologiialyq saraptama jáne monitoring ǵylymi-praktikalyq ortalyǵy» filialy direktorynyń orynbarasy Manar Smaǵul vaktsinalaýdyń maqsaty týraly aitty.
«Vaktsinalanǵan adamdar kóp bolǵan saiyn, qozdyrǵyshtardyń taralýy keńistigi tarylady. Vaktsinadan bas tartýdan buryn oilaný kerek, iaǵni ol jeke ózine ǵana emes, sonymen qatar jaqyn adamdary aldynda jaýapkershiligi bar ekenin sezingeni jón. Óitkeni vaktsina saldyra almaityn adamdar bar. Ekpe saldyrǵandar kóbeigende, virýstyń taralýy da shekteledi. Vaktsinalaý saiasaty osyǵan negizdelgen. Koronavirýsqa qarsy vaktsinalaý týraly aitqan kezde, bizdiń maqsat – ujymdyq immýnitetti qurý», - dedi Manar Smaǵul.
