Koronavirýs infektsiiasyna qarsy «QazCovid-in ®» qazaqstandyq vaktsinasy klinikaǵa deiingi zertteýden ótti, dep habarlaidy "Ult aqparat".
«Dárilik zattar men meditsinalyq buiymdardy saraptaý ulttyq ortalyǵynyń (DZSUO) Almaty qalasyndaǵy aimaqtyq filialynyń farmakologiialyq synaq zerthanasy bazasynda COVID-19 qarsy qazaqstandyq belsendi emes vaktsinany (QazCovid-in ®️) klinikaǵa deiingi zertteý aiaqtaldy.
Janýarlarǵa vaktsinanyń kúsheitilgen dozasyn salyp, onyń qaýipsizdigi men ýytty áseri muqiiat tekserildi. Sonymen qatar, osy zertteý aiasynda otandyq vaktsinanyń aǵzaǵa allergiialyq reaktsiiasy men deneni titirkendirgish áseriniń joq ekeni anyqtaldy.
Jalpy zertteý ádisterinen basqa, vaktsinanyń qaýipsizdik deńgeii qannyń gematologiialyq jáne biohimiialyq kórsetkishterimen rastaldy. Vaktsinanyń janýarlardyń ishki múshelerine áseri de baǵalandy», - dedi QR Densaýlyq saqtaý ministrligi Taýarlar men kórsetiletin qyzmetterdiń qaýipsizdigi men sapasyn baqylaý komitetine qarasty «Dárilik zattar men meditsinalyq buiymdardy saraptaý ulttyq ortalyǵy» RMK-dan».
Málim etilgendei, jiti zertteý nátijeleri klinikaǵa deiingi zertteý COVID-19 qarsy otandyq vaktsina ýytty emes ekenin anyqtady jáne ony keiin klinikalyq synaq barysynda erikti-adamdarǵa qoldanýǵa bolatyndyǵyn kórsetti.
«Jańa vaktsinanyń tiimdiligi men qaýipsizdigin tolyq baǵalaý úshin, qazaqstandyqtardy vaktsinatsiialaý úshin odan ári keń aýqymdy klinikalyq zertteýler qajet. Zertteýdiń barlyq kezeńi ótkizilgennen keiin ǵana vaktsinanyń qaýipsizdigi týraly aitýǵa bolady», - dedi biologiia ǵylymdarynyń kandidaty, dotsent, «Dárilik zattar men meditsinalyq buiymdardy saraptaý ulttyq ortalyǵy» Almaty farmakologiialyq synaq zerthanasynyń meńgerýshisi Valentina Shnaýkshta.
Atap ótilgendei, barlyq eksperiment Dárilik zattar men meditsinalyq buiymdardy saraptaý ulttyq ortalyǵynyń janýarhanasyndaǵy eksperimenttik janýarlarǵa jasalǵan.
«Farmakologiialyq zertteýler zerthanasy GLP OECD sáikes Slovak ulttyq akkreditteý qyzmetiniń (SNAS) halyqaralyq akkreditteý mártebesine ie jáne Qazaqstandaǵy bioekvivalentti zertteý júrgizetin jalǵyz zerthana.
Esterińizge sala keteiik, buǵan deiin Dúniejúzilik densaýlyq saqtaý uiymy qazaqstandyq ǵalymdardyń jumysyn óziniń resmi saitynda tirkep, ony klinikaǵa deiingi zertteýge ruqsat etilgen Covid-19 qarsy vaktsinaǵa kandidattardyń tizimine qosqan bolatyn.
Otandyq belsendi emes vaktsinany QR BǴM Ǵylym komitetiniń Biologiialyq qaýipsizdik problemalary ǵylymi-zertteý institýtynyń qyzmetkerleri ázirledi. Vedomstvonyń málimetinshe, ol Qazaqstandaǵy naýqastardan bólingen virýs shtammy negizinde jasalǵan», - dedi ortalyqtyń baspasóz qyzmetinen.
Eske salaiyq, Qazaqstanda 2020 jyldyń 23 naýryzynda COVlD-19-ǵa shaldyqqan alǵashqy patsientten patologiialyq material alynyp, bir aptadan keiin QR BǴM Ǵylym komitetiniń Biologiialyq qaýipsizdik problemalary ǵylymi-zertteý institýty SARS-CoV-2 virýsyn bólip shyǵardy.
2020 jyldyń 9 mamyrynda COVlD-19-ǵa qarsy kanditat inaktivtelgen vaktsina ázirleý boiynsha jumys aiaqtalyp, onyń hattamasy Dúniejúzilik densaýlyq saqtaý uiymyna jiberildi.
15 mamyrda DDSU aldyn ala tekserýden keiin ony klinikaǵa deiingi synaqqa jiberilgen kandiat vaktsinalar tizimine qosyp, vaktsina jáne ázirleýshi týraly aqparatty resmi saitynda ornalastyrdy.
2020 jyldyń 15 mamyrynda zerthanalyq tyshqan, siriialyq atjalman, teńiz shoshqasy, kúzen jáne úi qoianyna kandidat vaktsinany klinikaǵa deiingi synaq bastaldy. Klinikaǵa deiingi synaq vaktsinanyń DDSU reglamenttegen barlyq parametrler, atap aitqanda ýyttylyǵy, dert týyndatýshylyǵy, allergendiligi, immýnogendigi boiynsha DDSU talaptaryna jáne Qazaqstan Respýblikasynyń memlekettik farmakopiiasyna sai keletindigin kórsetti.
2020 jyldyń 6 shildesinde vaktsina QR DSM Ulttyq dárilik zattardy saraptaý ortalyǵyna berildi. Ortalyq buǵan deiin Biologiialyq qaýipsizdik problemalary ǵylymi-zertteý institýty alǵan vaktsinany klinikaǵa deiingi synaq nátijeleriniń jańǵyrtylatyndyǵyn qýattady.
2020 jyldyń 10 shildesinde Biologiialyq qaýipsizdik problemalary ǵylymi-zertteý institýty vaktsinany maimylǵa (makaka rezýs) synaqtan ótkizýdi bastady. lg M, lg G antidene titri jetinshi kúnde 3,5 10Q (joǵary kórsetkish) bolǵan edi.
Dúniejúzilik densaýlyq saqtaý uiymynyń talabyna sáikes, 2020 jyldyń 13 tamyzynda makak-rezýstan antideneniń keminde 7 log bolýy tiis sońǵy titrin anyqtaý josparlanyp otyr. Bul joǵary immýnogendik kórsetkish sanalady.
2020 jyldyń 26 shildesinde vaktsinanyń 5 ázirleýshisi tiri virýspen jumys isteý barysynda qaýipsizdikterin qamtamasyz etý úshin erikti túrde vantsinany ózderinde synady. Birneshe táýlik ótkennen keiin olar ózderin jaqsy sezinip, dene qyzýy men allergiiasy bolmaǵan.
Otandyq vaktsinanyń klinikaǵa deiingi synaǵy biylǵy 20 tamyzda aiaqtalyp, nátijesi QR Densaýlyq saqtaý ministrligine beriletini buǵan deiin málim etilgen edi.
QR Densaýlyq saqtaý ministrliginen ruqsat alynǵannan keiin 2020 jyldyń 20 qyrkúieginde Almaty qalasyndaǵy klinikanyń bazasynda COVID-19-ǵa antidenesi joq 44 eriktige klinikalyq synaq (I faza) bastalatyndyǵy kútiledi.
2020 jyldyń qazan aiynyń ortasynda Dúniejúzilik densaýlyq saqtaý uiymynyń talaptaryna sai keletin 200 eriktige klinikalyq synaq ótkizýdiń II fazasyna shyǵý josparlanǵan. Klinikalyq synaqtyń II fazasy 2020 jyldyń jeltoqsan aiynda aiaqtalýy tiis.
Kóptegen eldiń (Qytai, AQSh, Resei) tájiribesin jáne halyqty vaktsinamen qamtamasyz etý qajettigin qaperge ala otyryp, klinikalyq synaq fazasynyń sanyn 4-ten 2-ge deiin qysqartý qarastyrylyp jatyr.
Bul DDU talaptaryna qaishy bolmaidy. Kandidat vaktsinanyń klinikalyq synaq nátijelerin DDU rastaǵan jaǵdaida Qazaqstan institýty janyndaǵy qurylys jumystary júrgizilip jatqan Immýnobiologiialyq preparattar óndirisi zaýyty vaktsina shyǵarýǵa daiyn. Zaýyttyń jobalyq qýaty jylyna 60 mln dozany quraidy. Qurylys jumysy 2020 jyldyń jeltoqsanynda aiaqtalady.
