QR Memlekettik bas sanitarlyq dárigeri Aijan Esmaǵambetova Qazaqstanda koronavirýs juqtyrǵan 76 bala, onyń ishinde bir jasqa tolmaǵan eki balanyń baryn málim etti, dep habarlaidy QazAqparat.
«Qazirgi ýaqytta elde koronavirýs infektsiiasyn juqtyrǵandardyń ishinde bir jasqa tolmaǵan eki bala bar. Olar klinikalyq hattamaǵa sáikes qandai preparattardy qandai mólsherde berý kerektigi bekitilgen tártipke sai em alýda. Ol balalardyń biriniń jaǵdaiy qanaǵattanarlyq, virýs juqtyrǵanymen aýrýdyń belgisi baiqalmaidy. Ekinshi balanyń jaǵdaiy aýyr. Biraq ol bala týabitti patologiiasyna bailanysty aýyr jaǵdaida jatyr», - dedi Aijan Esmaǵambetova OKQ-da onlain rejimde ótken baspasóz máslihatynda.
Memlekettik bas sanitarlyq dárigeri Qytaidan kelgen meditsina mamandarynyń tájiribesi týraly da sóz qozǵady.
«Qytailyq mamandar koronavirýstyń aldyn alý boiynsha Qazaqstandaǵy sharalarmen tanysty. Álbette olardan alǵan tájiribeni biz óz jumysymyzda paidalanyp jatyrmyz. Jalpy meditsinalyq qyzmetkerlerdiń arasynda qazirgi tańda 13 óńirde 423 koronavirýs infektsiiasyn juqtyrý jaǵdaiy tirkeldi. Joǵary kórsetkish Almatyda (53 paiyz), Nur-Sultanda (33 paiyz), Shymkentte (24 paiyz) baiqalýda. Meditsinalyq uiymdarda dárigerlerdiń jetispeýshiligin boldyrmaý maqsatynda ár óńirde dárigerlerdiń 10-20 paiyzdyq rezervi qarastyrylǵan. Sol sebepti búgingi tańda meditsina qyzmetkerleri jetkilikti dep aitýǵa bolady», - dedi ol.
