24 sáýirde tańǵy saǵat 8:30-da Qazaqstannyń densaýlyq saqtaý ministrligi Shymkent qalasynda koronavirýstan bir naýqastyń kóz jumǵanyn habarlady. Naýqas - 1968 jyly týǵan er adam.
Shymkent qalalyq densaýlyq saqtaý basqarmasy ókilderiniń habarlaýynsha, ol Abai aýdanynda turǵan. 20 sáýirde qalalyq infektsiialyq aýrýhanasynyń reanimatsiia bólimine jatqyzylǵan.
Aýrýhanaǵa túsken sátte jaǵdaiy aýyr bolǵandyqtan, jasandy tynys alý apparatyna qosylǵan. Dárigerlerdiń aitýynsha, naýqas diagnozynda koronavirýstan bólek "dilatatsiialyq kardiomiopatiia, júrekshe fibrilliatsiiasy, arteriialyq gipertenziia, sozylmaly júrek aýry, qant diabeti" bolǵan.
"Hattamaǵa sáikes, barlyq qajetti em-dom jasaldy, respýblikalyq mamandarmen birneshe ret keńes ótti. Reanimatsiia sharalaryna qaramastan 23 sáýirde saǵat 20:30-da naýqas qaitys boldy" delingen resmi habarlamada.
Shymkent qalasynda tórt adam virýstan qaitys bolǵan. Qalada virýs juqtyrǵandar 139 adam boldy. 18 adam jazylǵan.
Millionnan astam turǵyny bar qala respýblika boiynsha naýqastar sany jaǵynan tórtinshi orynda tur.
Qazaqstanda koronavirýstan barlyǵy 21 naýqas qaitys bolǵan. Dárigerlerdiń aitýynsha, olardyń basym bóliginde sozylmaly aýrýlar bolǵan.
