Pandemiia kezeńinde Nur-Sultan qalasynyń ákimdigi 43 milliard teńgeni ońtailandyryp, qajetti salalarǵa baǵyttady. Bul týraly Nur-Sultan qalasynyń ákimi Altai Kólginov aityp berdi, dep habarlaidy QazAqparat.
«Pandemiianyń jaǵymsyz saldary boldy, ásirese odan shaǵyn jáne orta biznes zardap shekti. Jergilikti biýdjetke te jyl basynda boljanǵan túsimder tolyq túspeýi múmkin. Memleket ShOB sýbektilerin qoldaý úshin jeńildikter jasady, sondyqtan jyl sońyna qarai shamamen 47 mlrd teńge bizdiń biýdjetke túspeýi múmkin. Korporativti tabys salyǵy boiynsha da jyl basynda tólenýi tiis 10 mlrd teńgeden astam qarajat túspeýi múmkin. Osyǵan bailanysty, Memleket basshysynyń tapsyrmasymen Nur-Sultan ákimdiginiń jergilikti biýdjetin 43 milliard teńgege ońtailandyrdyq», - dedi ákim Ortalyq kommýnikatsiialar qyzmetinde ótken brifingte.
Únemdelgen qarajat eń aldymen COVID-19 indetimen kúreske, densaýlyq saqtaý júiesin damytýǵa, dári-dármek pen meditsinalyq jabdyqtar satyp alýǵa jumsalǵan.
«Bilim berý júiesin damytýǵa da kóńil bóldik, sebebi qashyqtan oqytý formaty úshin az qamtylǵan otbasy balalaryna noýtbýkter men roýterler qajet boldy. Ári qarai áleýmettik kómek kórsetýge, ekonomikanyń naqty sektoryn qoldaýǵa, infraqurylymdy damytyp, turaqtandyrý qoryn toltyrýǵa mán berdik.
Jalpy alǵanda elordanyń áleýmettik-ekonomikalyq kórsetkishteri oń nátije kórsetip otyr. Pandemiiaǵa qaramastan, júrgizilgen memlekettik sharalardyń arqasynda, negizgi kapitalǵa 1 trln teńge investitsiia túsedi dep boljap otyrmyz. Salystyrar bolsaq, 2019 jyly 900 mlrd teńgeden astam qarajat túsken edi», - dedi Altai Kólginov.
