Koronavirýs qaterine bailanysty «Rolan Garros» týrniri keiinge shegerildi, dep habarlaidy "Ult aqparat".
Frantsiia ashyq chempionatynyń baspasóz qyzmeti málim etkenindei, «Rolan Garros» jarysy 20 qyrkúiek pen 4 qazan aralyǵynda ótetin boldy.
Atalmysh doda biyl 18 mamyrda bastalýy tiis edi. Alaida uiymdastyrýshylar karantindik sharalarǵa bailanysty bul ýaqytta ótkizýden qaýiptenýde.
«Bul qazirgidei qiyn kezde biz qabyldaǵan kúrdeli de batyl sheshim boldy. Densaýlyq pen qaýipsizdik úshin kúreste bir bolyp, bárine jaýapkershilikpen qaraýymyz kerek», dedi Frantsiia tennis federatsiiasynyń prezidenti Bernar Gýdichelli.
Osylaisha «Rolan Garros» týrniri Metts (Frantsiia), Sankt-Peterbýrg (Resei), Sofiia (Bolgariia), Chjýhai jáne Chendý (Qytai) jarystarymen bir kezde ótetin boldy. Osy merzimde Bostonda (AQSh) Leiver kýbogy da bolady.
«Rolan Garros» – jyl saiyn ótetin tórt «Úlken dýlyǵa» týrniriniń biri.
Taǵy bir «Úlken dýlyǵa» dodasy – Ýimbldon týrniri biylǵy 29 maýsym men 12 shilde aralyǵynda ótedi dep josparlanǵan. Bul jarysty uiymdastyrýshylar ázirge ýaqytyn ózgerte qoiǵan joq. Degenmen olar da barlyq qatysýshylar men qyzmetkerlerdiń, jankúierlerdiń densaýlyǵy men qaýipsizdigi basty orynda ekendigin, koronavirýsqa bailanysty jaǵdaidy jiti baqylap otyrǵandyǵyn jetkizdi.
Eske sala keteiik, budan buryn Reseide barlyq fýtbol jarystarynyń toqtatylǵanyn jazǵan bolatynbyz.
