Koronavirýsqa qarsy birden eki vaktsina budan da qoljetimdi ári qoldanysta yńǵaily bolýy tiis.
Amerika biligi Pfizer óndirgen preparatty joǵary dep sanalǵan burynǵy temperatýradan salqyndaý jaǵdaida saqtaýǵa bolatynyn, al Johnson & Johnson shyǵarǵan, birinshi ekpeden keiin tolyq qorǵanysty qamtamasyz etetin jańa vaktsinanyń kóp uzamai AQSh pen Eýroodaqta litsenziia alatynyn málimdedi. Izrail óz turǵyndarynyń jartysynan kóbine ekpe jasaǵanyn jariialady, dep habarlaidy BBC agenttigi.
Djons Hopkins ýniversitetiniń dereginshe, pandemiia bastalǵan ýaqyttan beri koronavirýsqa shaldyqqan adamdardyń jalpy sany 113,1 mln adamdy qurap otyr, dertten 2,5 mln jýyq adam qaitys boldy. Sonymen birge, sońǵy aptalarda infektsiianyń taralý qarqyny tómendep keledi: jańa oqiǵalar, aýrýhanada jatqan patsientterdiń sany azaiýda. Olai bolǵanymen, sarapshylar Covid-19 virýsynyń budan da juqpaly ári vaktsina tolyq qorǵai almaityn jańa shtamdarynyń qaýpi týraly eskertip jatyr.
Pfizer-BioNTech vaktsinasy kádimgi muzdatqyshta Tselsii boiynsha 20 gradýs tómen temperatýrada eki aptaǵa deiin saqtala alady, dep málimdedi beisenbi kúni Amerikanyń Azyq-túlik jáne dári-dármekter sapasyn qadaǵalaý basqarmasynan. Buǵan deiin bul vaktsina paidaly qasietin tek Tselsii boiynsha minýs 70 gradýs temperatatýrada saqtaidy dep sanalǵan. Bul arnaiy kúrdeli jabdyqtardyń bolýyn qajet etip, onyń tasymaldanýy men taratylýyn qiyndatqan edi.
AQSh pen Eýropada adamdardyń kóbi Covid-19 virýsyna qarsy osy vaktsinany saldyrtyp júr. Álemde keńinen taralǵan basqa preparattar – Oxford/AstroZeneca, Moderna, reseilik «Spýtnik V» jáne qytailyq Sinovac.
Izrail óz turǵyndarynyń jartysyna ekpe saldyrtty, sonyń ishinde 35 paiyzyna vaktsina ekinshi ret egildi, dep habarlady juma kúni Izraildiń densaýlyq saqtaý ministri Iýlii Edelshtein. El halqynyń sany 9,3 mln adamdy qurap otyr.
Immýndaý sany boiynsha paiyzdyq qatynasta Izrail álem boiynsha birinshi orynda tur. Premer-ministr Biniamin Netaniahý naýryz aiynyń sońyna qarai 16 jastan asqan barlyq izraildyqtarǵa ekpe jasap, sáýirdiń basynda karantin shekteýlerin birtindep alyp tastaýǵa ýáde etti.
