Koronavirýs infektsiiasynyń taralýyna qarsy kúres úshin memleketter qabyldaǵan sharalar esirtki óndirý kólemine áser etti. Bul týraly QazAqparat BUU Jańalyqtar saityna silteme jasap habarlaidy.
Esirtki jáne qylmys jónindegi BUU basqarmasynyń baiandamasynda aitylǵandai, álemdegi jaǵdai esirtki trafiginiń baǵyttaryn ózgertýge ákep soqty.
«Halyqaralyq áýe reisteriniń toqtatylýyna bailanysty sintetikalyq esirtkini, atap aitqanda metamfetamindi zańsyz jetkizý tizbegi úzildi. Esirtki satýshylar kontrabandanyń balamaly baǵyttaryn izdestire bastady, onyń ishinde aǵyny qurlyq arqyly ótetin geroindi de izdei bastady. Qazir geroindi de kokain siiaqty teńiz arqyly tasymaldaýǵa tyrysady. Eýropa porttarynda únemi kokainniń iri partiialary, al Úndi muhitynyń jaǵalaýyndaǵy elderde geroin men basqa da esirtki túrleri tárkilenedi», - delingen baiandamada.
Geroin men kokainniń zańsyz jetkizilýiniń azaiýy qara naryqta esirtki tapshylyǵyna alyp keldi. Sarapshylar bul esirtkini tutynýdy azaitýǵa kómektesedi dep úmittenedi. Biraq ekinshi jaǵynan, olar bul jergilikti deńgeide óndiriletin basqa ziiandy zattarǵa táýeldiliktiń ósýine ákelýi múmkin dep qaýiptenedi.
COVID-19 taralý jaǵdaiynda halyqaralyq saýdanyń tómendeýi sintetikalyq esirtki óndirisinde qoldanylatyn prekýrsorlardyń tapshylyǵyna ákelýi múmkin.
