Ońtústik Afrikada koronavirýspen bailanysty birinshi jaǵdai tirkeldi, dep habarlaidy BBC News agenttigi.
Jańa virýs jubaiymen birge Italiiaǵa baryp kelgen 38 jastaǵy azamattan anyqtaldy.
Osylaisha, Afrika qurlyǵynda koronavirýs juqtyrǵandar sany 27 adamǵa jetti. Aýrý juqtyrǵandardyń basym bóligi Aljirde – 17 adam, odan keiin Senegalda – 4 adam.
Ońtústik Afrika eliniń Densaýlyq saqtaý ministri Tsveli Mhizeniń sózinshe, eki balasy bar ońtústikafrikalyq jup 1 naýryz kúni Italiiadan oralǵan 10 adamnan turatyn toptyń múshesi bolǵan. Qazirgi tańda virýs juqtyrǵan adam men ony qaraǵan dáriger oqshaýlandyryldy, dedi ministr.
Onyń sózinshe, virýs juqtyrǵan dárigermen bailanysty bolǵan adamdardy anyqtaý úshin eldiń shyǵys bóligindegi provintsiia Kvazýlý-Natalǵa arnaiy top jóneltildi.
Qazirgi tańda álem boiynsha AITV indetiniń ortalyǵy sanalatyn Ońtústik Afrikada milliondaǵan adamdardyń immýndyq júiesi álsiregen. Bul jaǵdai olardyń jańa virýsqa qarsy turýyna keri áserin tigizeri anyq. Afrikada qazir osyndai alańdaýshylyq bar.
BBC News sonymen qatar Japoniiada koronavirýs juqtyryp, aýrýhanaǵa jatqyzylǵan eki ońtústikafrikalyq azamattyń saýyǵyp, jaqynda úilerine qaitatynyn habarlady. Olar ózderi jumys isteitin Diamond Princess krýizdik lainerinen túskennen keiin baqylaýǵa alynǵan.
Aita keteiik, atalmysh kemeniń bortyndaǵy adamdar Gonkongten túsip qalǵan jolaýshylardyń birinen koronavirýs anyqtalǵan soń ǵana, iaǵni alǵash ret qańtar aiynan bastap karantinge jatqyzyla bastady.
Ońtústik Afrika úkimeti Qytaidyń Ýhan qalasynan ózderiniń azamattaryn qaitaryp alǵylary keletinin málimdegen bolatyn.
«Qytaidan barlyǵy 185 ońtústikafrikalyq azamat elge qaitýǵa niet bilderip otyr»,-delingen úkimetiń málimdemesinde.
