Nur-Sultan qalasynyń qoǵamdyq densaýlyq saqtaý basqarmasynyń basshysy Timýr Muratov Ortalyq kommýnikatsiialar qyzmetinde ótken onlain brifing barysynda qaladaǵy epidemiologiialyq ahýal týraly aitty, dep habarlaidy "Ult aqparat".
Basqarma basshysynyń sózinshe, elordada epidemiologiialyq jaǵdai turaqsyz.
Qala infektsiia juqtyrý boiynsha áli de «qyzyl aimaqta». Orta eseppen KVI-men kúndelikti 430 jańa jaǵdai tirkelip otyr. Ol byltyrǵy shilde aiyna qaraǵanda kóbirek.
«Elordada koronavirýspen aýyratyndardy emdeý úshin 14 aýrýhana tartyldy. Atalǵan aýrýhanalarda 1 889 tósek-oryn bar. Búgingi kúni 985 naýqas aýrýhanalarda em qabyldap jatyr. Onyń ishinde koronavirýs 901 adamda rastalǵan jáne 84 adam pnevmoniiamen em qabyldaýda. Jansaqtaý bóliminde 95 adam, onyń 21 jasandy ókpe jeldetý apparatynda jatyr. Sonymen qatar 4 myńǵa jýyq adam úide ambýlatorly em qabyldaýda, - deidi Timýr Muratov.
