Densaýlyq saqtaý ministrligine qarasty Ulttyq qoǵamdyq densaýlyq saqtaý ortalyǵynyń direktory Damir Kópjasarov COVID-19 – koronavirýstyń mýtatsiiaǵa ushyrýy múmkin ekenin málim etti, dep habarlaidy QazAqparat.
«Halyqaralyq jáne qazaqstandyq epidemiologtardyń baǵalaýynsha, koronavirýsta tsirkýliatsiia bolady. Sonymen qatar koronavirýstyń bul túri mýtatsiialanatyndai sipatqa ie. Iaǵni qandai da bir mýtatsiiaǵa ushyraýy múmkin», - dedi Damir Kópjasarov onlain rejimde ótken baspasóz máslihatynda.
Ol sonymen qatar koronavirýsty aldyn alýdyń negizgi kezeńderi týraly da aityp berdi.
«Koronavirýstyń aldyn alýdyń kezeńderine keler bolsaq, birinshi kezeń – syrtqy qadaǵalaý, ekinshisi – ishki qadaǵalaý bolsa, úshinshisi – karantin sharalary. COVID-19 – koronavirýstyń jańa shtammy. Onyń toby kóp. Alaida dál osy COVID-19 túri birinshi ret tirkelip otyr. Sol sebepti dál osy infektsiiany aldyn alýdyń birden-bir joly – karantin sharalary. Dál qazirgi ýaqytta karantin sharalary osy indetten bizdi saqtandyrady», - dedi spiker.
Ortalyq direktory sondai-aq Qazaqstandaǵy shekteý sharalarynyń arqasynda virýsty jappai juqtyrý jaǵdaiy tirkelmegenin málim etti.
«Infektsiia taralý barysy baqylaýda. Epidemiologiialyq qadaǵalaý júiesi men men SEQ infektsiiany qadaǵalap otyr. Tórtinshi kezeń – karantinnen keiingi ýaqyt bolmaq. Onyń negizinde biz epidemiologiialyq ahýalǵa bailanysty shekteý sharalaryn birtindep ala bastaimyz. Karantinnen keiingi kezeńde halyqtyń belgili bir tobynyń ishinen juqtyrý jaǵdailaryn anyqtaýǵa baǵyttalady. Testileýden ótkizýden bas tartpaimyz. Juqtyrǵan jaǵdailar anyqtalady. Sebebi juqtyrǵandardyń 60 paiyzy aýrýǵa shaldyqqandaryn sezbeidi de. Mine Qazaqstan osy tórt kezeń boiynsha virýs qaýpin tosqaýyl qoiýǵa kúsh salady», - dedi Damir Kópjasarov.
