QR Bilim jáne ǵylym ministri Ashat Aimaǵambetov Qazaqstan muǵalimderin kásibi merekesimen quttyqtady, dep habarlaidy "Ult aqparat".
«Biliktiligi joǵary, bedeli myqty, qoǵamda qurmetke bólengen muǵalimdersiz memlekettiń jarqyn bolashaǵyn elestetý qiyn. Sebebi ekonomikanyń, mádeniet pen tutastai qoǵamnyń damýy sizderdiń eńbekterińizdiń nátijesine tikelei bailanysty. Ustaz bolý – júrektiń tańdaýy, jannyń qalaýy. Bul jumys asqan jankeshtilik, zor shydamdylyq pen balalarǵa degen mahabbatty talap etedi.Elimizdiń betke ustar azamattaryn tárbielep, jaýapkershiligi mol jáne abyroily mindetti atqaryp júrsizder. Oqýshylaryńyzdyń jeńisterine qýanyp, sátsizdikterine birge qynjylasyzdar, qinalǵan shaqtarynda qoldaý kórsetesizder», - dep jazdy ministr facebook paraqshasyna.
Ministr ár ustazdyń elimizdiń damýyna qosyp otyrǵan úlesin memlekettiń asa joǵary baǵalaitynyn jetkizdi. Onyń birden bir dáleli – «Pedagog mártebesi týraly» Zańnyń qabyldanýy.
«Osy Zańnyń qabyldanýy, shyn máninde, elimiz úshin asa mańyzdy boldy, sondyqtan Memleket basshysynyń ustazdar qaýymyna kórsetken qoldaýy úshin alǵysymyz sheksiz. Zańda muǵalimderdiń tek áleýmettik kepildikteri ǵana emes, sonymen qatar quqyqtary men mindetteri de resmi túrde bekitilgen. Búgingi tańda ustazdar qaýymy artyq eseptilik pen qyzmetine jatpaityn fýnktsiialardan zań júzinde bosatyldy. Zańdaǵy normalardyń múltiksiz iske asyrylýy qamtamasyz etilýi tiis», - deidi A. Aimaǵambetov.
Sondai-aq muǵalimderdiń jalaqysy da aitarlyqtai artty. Synyp jetekshiligi men dápter teksergeni úshin tólenetin qosymsha aqynyń mólsheri eki ese ósti.
«Pedagogikalyq sheberlik biliktiligi úshin tólenetin qosymsha aqy da laýazymdyq jalaqysynyń 30-50%-y mólsherinde belgilenip otyr. Magistr dárejesi bar muǵalimderge ai saiyn 27 myń kóleminde qosymsha aqy qarastyrylǵan. Alǵash ret bilim berý uiymdarynyń direktorlary men orynbasarlaryna da basqarýshylyq sheberligi úshin laýazymdyq jalaqysynyń 30-dan 100 %-ǵa deiin qosymsha aqy bekitildi», - dep túsindirdi ministr.
Budan bólek, Zańda muǵalimderdiń jumys ýaqyty men demalys ýaqyty, júktemeleriniń azaiýy jáne basqa da áleýmettik qoldaý sharalary naqty kórsetilgen.
«Bala zor yqylaspen bilim alyp, jan-jaqty damýy kerek. Biz balalarymyzdyń mektep partalaryna qaita oralýyn qalaimyz. Muǵalim mamandyǵynda ýaqyt talabynan qoryqpaityn, óz shákirtterine úlgi bola biletin adamdar ǵana jumys isteidi. Koronavirýs pandemiiasy ýaqyttyń syn-qaterine ilesip qana qoimai, osyndai kezeńde kóshbasshylyq qasietke ie bolýdyń qanshalyqty mańyzdy ekenin kórsetti. Osynaý kúrdeli kezeń muǵalimderdiń qoǵamdaǵy róli men mańyzyn taǵy bir aiqyndap berdi. Barshańyzǵa osy qiyn mindetti abyroimen atqaryp jatqandaryńyz úshin jáne qoldaý bildirip otyrǵandaryńyz úshin alǵys aitamyn. Biz muǵalimderdiń quqyqtary men múddelerin qorǵaýǵa, áleýmettik kepildikterdi arttyrýǵa, osy mamandyqqa eń laiyqty túlekterdi tartýǵa baǵyttalǵan jumysymyzdy odan ári jalǵastyratyn bolamyz. Mereke kúni barshańyzǵa zor densaýlyq, otbasylaryńyzǵa bereke, shyǵarmashylyq tabystar tileimin! Jaqyndaryńyzdyń yqylasy men qurmetine bólene berińizder!», - dedi Bilim jáne ǵylym ministri.
