QR Densaýlyq saqtaý ministri Aleksei Tsoi koronavirýsqa qarsy reseilik vaktsinany satyp alý jóninde pikir bildirdi, dep habarlaidy QazAqparat.
«Biz kóptegen óndirýshilermen, sonyń ishinde reseilik óndirýshilermen osyndai kelissózder júrgizip jatyrmyz. Qazaqstanda resmi tirkeý alǵan jaǵdaida ǵana vaktsinany jalpy qoldanýǵa ruqsat etiletinin túsiný kerek. Iaǵni, osy vaktsinanyń tiimdiligin, qaýipsizdigin teksergennen keiin ǵana resmi tirkeý beriledi. Sondyqtan Qazaqstanda qoldanylatyn kez kelgen vaktsina osy protsedýralardan ótýi kerek. Tiisinshe ol klinikalyq synaqtardyń sońǵy satylarynan ótýi qajet. Sondyqtan janama áseri bar nemese dáleldenbeitin kez kelgen vaktsina árine, Qazaqstan aýmaǵyna jiberilmeidi», - dep jaýap berdi ministr Ortalyq kommýnikatsiialar qyzmetinde tilshi suraǵyna.
Onyń aitýynsha, qazirgi ýaqytta barlyq vaktsinalar, onyń ishinde reseilik vaktsina da synaq kezeńderinen ótip jatyr.
«Sondyqtan árbir tehnologiialyq kompaniia óz ónimderin jetildirý boiynsha jumys isteidi. Biz basqa elder men basqa ónimderdi baqylap otyramyz. Sondyqtan Qazaqstanda tek tekserilgen vaktsina ǵana paidalanylady. Biz úshin resmi tujyrymdar men rastalǵan resmi derekter óte mańyzdy. Bul vaktsinalar qabyldaý kezinde de taǵy tekseriledi. Qadaǵalaý júiesinen ótken soń ǵana ónim naryqqa jiberiledi», - dedi A. Tsoi.
