Densaýlyq saqtaý ministrligi 4 aqpandaǵy epidemiologiialyq ahýaldy baǵalaý matritsasyn jariialady, dep habarlaidy «Ult aqparat».
4 aqpandaǵy epidemiologiialyq ahýaldy baǵalaý matritsasyna sáikes, Qazaqstannyń tórt oblysy «qyzyl» aimaqta tur. Keshe, iaǵni 3 aqpanda Batys Qazaqstan «qyzyl» aimaqtan «sary» aimaqqa ótken edi, alaida búgin ol óńir qaitadan «qyzyl» aimaqqa engizilgen. Sonymen qatar, Aqmola, Soltústik Qazaqstan, Pavlodar oblystary da qyzyl aimaqta tur.
Odan bólek «sary» aimaqta Nur-Sultan qalasy, Shyǵys Qazaqstan, Qostanai, Atyraý oblystary bar.
Qalǵan óńirler men qalalar – «jasyl» aimaqta. Jalpy Qazaqstan áli de «sary» aimaqta tur.
Eske sala ketsek Qazaqstanda ótken táýlikte 1110 adam koronavirýs indetinen emdelip shyqqan bolatyn. Áitse de elde indetten jazylǵandardan góri áli de juqtyrǵan azamattardyń sany kóp bolyp tur. 3 aqpan kúni elde koronavirýs infektsiiasyn juqtyrýdyń 1280 jaǵdaiy rastalǵan.
