QR Bilim jáne ǵylym ministri Ashat Aimaǵambetov qazaqstandyq vaktsinany saldyrýǵa erikti bolý joldaryn aityp berdi, dep habarlaidy QazAqparat.
«Erikti bolý óte ońai. Almaty, Taraz qalalarynda erikti bolý múmkindigi bar. Qazirgi ýaqytta Almatyda tiisti sertifikaty bar birneshe klinikalyq bazalarda skrining jáne eriktilerdi vaktsinalaý júrip jatyr. Qajet bolsa, bizde bailanysýǵa bolatyn nómirler bar», - dep jaýap berdi Bilim ministri Ortalyq kommýnikatsiialar qyzmetinde tilshi suraǵyna.
Aita keteiik, elimizde QazCovid-in vaktsinasyn klinikalyq synaýdyń úshinshi kezeńi bastaldy. Onda úsh myń eriktige vaktsina salynatyny habarlandy.
«Biz úsh myń eriktini jinaimyz jáne jyl sońyna deiin olarǵa vaktsina salynady. Qazir de kóptegen eriktiler vaktsinalanyp úlgerdi. Erikti bolý úshin olar mindetti túrde meditsinalyq tekserýden ótýi kerek. Olar kóptegen egjei-tegjeili analizder tapsyrady. Analizden ótken soń kelisim jasalady, sharttar aitylady jáne ómirdi saqtandyrý máseleleri kelisiledi. Zańnamaǵa sáikes basqa da niýanstar bar. Osydan keiin ǵana erikti bolyp, vaktsinalar qabyldaidy. Ekpe salynǵannan keiin de kelisimde kórsetilgen talaptar bar», - deidi ministr.
Ashat Aimaǵambetov vaktsinanyń birinshi kezeńinde az ǵana ýaqytta kóptegen ótinim kelip túskenin atap ótti.
«Biz kóptegen ótinimderdi qabyldadyq jáne ótinim qabyldaýdy merziminen buryn jabýǵa májbúr boldyq. Ekinshi kezeńde de jaǵdai shamamen osyndai boldy. Qazir úshinshi kezeńde kontingenttiń kóp bolýyna bailanysty eriktilerdi aldyn ala úsh myńnan asyryp jinaǵymyz keledi. Sebebi úsh myń eriktini iriktep alý úshin skrining júrgizý óte mańyzdy. Qazir de eriktilerdi qabyldaý jalǵasýda. Erikti bolǵysy keletin azamattar osyndai quqyq pen múmkindikti paidalana alady», - dedi A. Aimaǵambetov.
