«Qazaq onkologiia jáne radiologiia ǵylymi-zertteý institýty» AQ basqarma tóraiymy, QR Ulttyq ǵylym akademiiasynyń akademigi, meditsina ǵylymdarynyń doktory Diliara Qaidarova koronavirýstyń qaterli isikke shaldyqqan naýqastarǵa qalai áser etetinin aitty, dep habarlaidy QazAqparat.
«Onkologiialyq aýrýǵa shaldyqqan naýqastardyń immýniteti óte tómen bolady. Bireý himioterapiia, taǵy biri hirýrgiialyq em aldy. Sondyqtan olar immýnitettiń tómendeýinen koronavirýsty tez juqtyrýy múmkin. Biz patsientterimizden, eń aldymen, ózderine uqypty qaraýdy suraimyz. Ásirese, aýrýhanaǵa kelgen týystary juqtyrýy múmkin. Infektsiiany juqtyrmas úshin maska rejimin, qol gigienasyn saqtaý qajet. Eger naýqasqa COVID-19 indeti qosylsa, onda biz koronavirýsty emdemeiinshe, isikke qarsy emdeýdi barlyq standarttar boiynsha júrgize almaimyz», - deidi ol.
Dáriger naýqastardy barlyq sanitarlyq normany qatań saqtaýǵa shaqyrdy. Áleýmettik araqashyqtyqty, qol gigienasyn saqtaýǵa jáne maska taǵyp júrýge keńes berdi.
«Qaýipti virýsty juqtyrǵan naýqastarǵa himioterapiia, sáýlelik terapiia taǵaiyndaý múmkin emes, óitkeni bul patsienttiń jaǵdaiyn odan saiyn nasharlatyp jiberedi. Sondyqtan saq júrý kerek», – dedi spiker.
Diliara Qaidarovanyń aitýynsha, kez kelgen onkologiialyq aýrý bastapqy kezde anyqtalsa, onyń tolyq jazylyp ketetinin tilge tiek etti. Eń bastysy, adamdar jyl saiyn profilaktikalyq tekserýden ótýi kerek.
«Buryndary qaterli isikke shaldyqqan adamdar aýrýyn jasyryp, ol týraly aitýǵa qorqatyn. Qazir bári ózgerdi. Qaterli isik sonshalyqty qorqynyshty emes. Biz barlyǵyn osy sózden qoryqpaýǵa, senimdi túrde emdelýge shaqyramyz. Der kezinde bastaǵan em-dom óz nátijiesin beredi», - dep qosty eldiń bas onkology.
Qazaqstanda búginde 187 myń adam onkologiialyq esepte tur.
