Ispaniia Premer-Ministri Pedro Sanches senbi kúni keshkisin ótken baspasóz máslihaty barysynda koronavirýs juqtyrý jaǵdaiynyń kórsetkishi tómendeitin bolsa, ispandyqtarǵa 2 mamyrdan bastap serýendeýge, jattyǵý jasaýǵa nemese júgirýge shyǵýǵa ruqsat beriletindigin málimdedi.
Bul jaiynda atalǵan eldiń EL PAÍS basylymy jazdy.
Bul Ispaniia Úkimetiniń elde 14 naýryzdan beri engizilgen qatań sharalardy jeńildetýge baǵyttalǵan ekinshi qadamy bolyp otyr. Jeksenbi kúnderi 13 jasqa deiingi balalarǵa eresek adamdardyń qaraýymen bir saǵat dalada serýendeýge ruqsat berilmek.
«Eger biz abailap áreket etetin bolsaq, onda bul sharadan keiin bir aptadan soń taǵy bireýi qoldanysqa engiziledi», - dedi Pedro Sanches.
El Premer-Ministriniń túsindirýinshe, árbir óńirdegi ahýalǵa bailanysty túrli jyldamdyqpen karantin jeńildetile bastaidy. Sonymen qatar ol ortalyqtyń úkimet karantin sharalaryn álsiretý josparyna jaýapty bolatyndyǵyn eskertti. Ispaniia Ministrler kabineti seisenbi kúnine tiisinshe jospardy bekitýi qajet.
Atap óterligi, sońǵy 2 kún boiy Ispaniiadaǵy koronavirýs indetinen kún saiynǵy ólim-jitim 400-den tómen bolyp otyr. Degenmen, indet Ispaniiaǵa aýyr soqqy boldy. Resmi derekke sáikes, 22 902 adam indetten kóz jumdy. Al indet juqtyrǵan patsientterdiń sany 223 759 adamǵa jetken. Biraq, qarttar úiindegi koronavirýs saldarynan ólgenderdiń resmi tirkelmegendigin eskerer bolsaq, bul san áldeqaida joǵary ekendigi túsinikti.
Sońǵy málimetterge qaraǵanda, Covid-19 juqtyrýdyń 20 paiyz jaǵdaiy densaýlyq saqtaý qyzmetkerlerinen anyqtalǵan. Bul kórsetish ózge elderdegi derekterge qaraǵanda birshama joǵary. Osyǵan qarai sarapshylar mundai jaittyń bolýyna josparlaýdyń nasharlyǵy men testileýge arnalǵan jiyntyqtar men qorǵanys quraldarynyń jetispeýshiligi sebep dep otyr.
