Búgin Grekiia koronavirýs juqtyrǵan alǵashqy adam tirkeldi, dep habarlaidy ekathimerini.com basylymy.
Basylymnyń málimetinshe, Italiianyń soltústiginen jaqynda ǵana kelgen Salonikidegi 38 jastaǵy áielden virýs anyqtalǵan. Eldiń densaýlyq saqtaý ministrligi onyń otbasy shamamen 14 kúnge karantinge jiberiletinin rastady.
Habarlamada densaýlyq saqtaý ókilderi Afinada densaýlyq saqtaý ministri Vasilisa Kikiliasanyń tóraǵalyǵymen shuǵyl jinalys ótip jatqany aitylǵan. Ministr jinalystan soń Salonikige barady.
Sondai-aq koronavirýstyń órshý jaǵdaiynda el biligi ýaqytsha mektepterdi, ýniversitetterdi, teatr, kinoteatrlardy, sporttyq jáne sýret ortalyqtaryn jabady.
Sonymen qatar Gulf Newshttps sársenbi kúni Kýveitte koronavirýs juqtyrý jaǵdailarynyń sany 25-ke jetkenin atap ótken. Tek búginniń ózinde 13 jańa jaǵdai tirkelgen. Virýs juqtyrǵandardyń barlyǵy Iranda bolǵan eken.
Kýveittiń densaýlyq saqtaý ministrligi koronavirýs juqtyrǵan barlyq patsient karantinde, jaǵdailarynyń turaqty ekenin aitty.
Dúisenbi kúni Kýveittiń Azamattyq aviatsiia basqarmasy jańa virýs órship turǵan Ońtústik Koreia, Tailand jáne Italiia elderine baratyn jáne keletin ushaqtardy toqtatqany týraly habarlaǵan bolatyn.
Diamond Princess krýizdik lainerinen jaǵymsyz jańalyq keldi, Japoniianyń Densaýlyq saqtaý, eńbek jáne ál-aýqat ministrliginiń málimetteri boiynsha, taǵy 14 adam koronavirýsty juqtyrǵan. Kemedegi virýs juqtyrǵandardyń jalpy sany qazirdiń ózinde 705 adamǵa jetti. Lainer Japoniianyń Iokogama portynda úsh aptadan beri tur.
