Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qisyqova JRVI belgileri bar nemese tynys alý joldary boiynsha qandai da bir aýrýdan seziktengen azamattardy tekserýden ótýge shaqyrdy, dep habarlaidy QazAqparat.
«Qazirgi tańda elordada karantinde 1819 adam jatyr. 16 sáýirdegi jaǵdai boiynsha, Nur-Sultan qalasyndaǵy observatsiialyq emhanada, atap aitqanda Jeltoqsan 34 mekenjaiyndaǵy №2 emhanada koronavirýs infektsiiasy boiynsha zertteýde 966 adam tekserildi. Onyń 28 jaǵdaiynda azamattardyń koronavirýsty juqtyrǵany rastaldy. Sol sebepti qala turǵyndarynan taǵy da ótinerimiz: JRVI-men aýyratyn azamattardyń bári nemese tynys alý joldary boiynsha aýrýdyń bolýynan seziktengen barlyq azamattardy atalǵan emhanaǵa nemese Jeńis 58 mekenjaiyndaǵy Ortalyq jol aýrýhanasyndaǵy pýlmonologiialyq bólimshesi bar provizorlyq statsionarǵa qaralýdy suraimyz», - dedi Sáýle Qisyqova «Habar 24» arnasynda onlain rejimde ótken baspasóz máslihatynda.
Onyń aitýynsha, Nur-Sultan qalasynda osy ýaqytqa deiin 19 765 adam PTR-diagnostikadan, odan bólek 8 716 adam 9-16 sáýiri aralyǵynda ekpres-testileýden ótken. Virýsqa kúdikti adamdar provizorlyq statsionarǵa jetkizilgen.
Aita ketsek, buǵan deiin Sáýle Qisyqova elordada qazirgi tańda koronavirýs infektsiiasyn juqtyrǵan 9 adam aýyr halde jatqanyn málim etken edi.
