Nur-Sultan qalasy ákiminiń orynbasary Baqtiiar Máken koronavirýs infektsiiasyna qatysty ekspress-testileý jaiynda aityp berdi, - dep habarlaidy QazAqparat.
«9 sáýirden bastap jappai ekspress-testileý júrgizý bastaldy, ony 12 752 adam tapsyrdy. Taǵy 41 myń ekspress-test kvota boiynsha arnaiy meditsina, politsiia, Ulttyq ulan qyzmetkerleri, áskeriler, qala tirshiligin qamtamasyz etý júiesi men kommýnaldyq qyzmetterdiń jumysshylary arasynda úlestirildi», - dedi B. Máken Ortalyq kommýnikatsiialar qyzmetinde.
Onyń sózine qaraǵanda, bul sharalar indetti der kezinde anyqtap, ýaqytyly meditsinalyq kómek kórsetýge múmkindik beredi.
Budan buryn habarlanǵandai, qazirgi tańda qalada koronavirýs infektsiiasynyń 433 jaǵdaiy tirkeldi. 255 naýqas statsionarlarda jatyr, 207 adam emdelip shyqty, úi karantininde 2 396 adam bar.
