نۇر-سۇلتان قالاسى ەكٸمٸنٸڭ ورىنباسارى باقتييار مەكەن كوروناۆيرۋس ينفەكتسيياسىنا قاتىستى ەكسپرەسس-تەستٸلەۋ جايىندا ايتىپ بەردٸ, - دەپ حابارلايدى قازاقپارات.
«9 سەۋٸردەن باستاپ جاپپاي ەكسپرەسس-تەستٸلەۋ جٷرگٸزۋ باستالدى, ونى 12 752 ادام تاپسىردى. تاعى 41 مىڭ ەكسپرەسس-تەست كۆوتا بويىنشا ارنايى مەديتسينا, پوليتسييا, ۇلتتىق ۇلان قىزمەتكەرلەرٸ, ەسكەريلەر, قالا تٸرشٸلٸگٸن قامتاماسىز ەتۋ جٷيەسٸ مەن كوممۋنالدىق قىزمەتتەردٸڭ جۇمىسشىلارى اراسىندا ٷلەستٸرٸلدٸ», - دەدٸ ب. مەكەن ورتالىق كوممۋنيكاتسييالار قىزمەتٸندە.
ونىڭ سٶزٸنە قاراعاندا, بۇل شارالار ٸندەتتٸ دەر كەزٸندە انىقتاپ, ۋاقىتىلى مەديتسينالىق كٶمەك كٶرسەتۋگە مٷمكٸندٸك بەرەدٸ.
بۇدان بۇرىن حابارلانعانداي, قازٸرگٸ تاڭدا قالادا كوروناۆيرۋس ينفەكتسيياسىنىڭ 433 جاعدايى تٸركەلدٸ. 255 ناۋقاس ستاتسيونارلاردا جاتىر, 207 ادام ەمدەلٸپ شىقتى, ٷي كارانتينٸندە 2 396 ادام بار.
