Soltústik Qazaqstan, Batys Qazaqstan oblystary men Nur-Sultan jáne Shymkent qalalarynda anyqtalǵan koronavirýs indetin juqtyrýdyń sońǵy oqiǵalary týraly málimet berildi, dep habarlaidy "Ult aqparat" coronavirus2020.kz-ke silteme jasap.
16 sáýir, saǵat 12.25-tegi sońǵy málimet boiynsha, Qazaqstanda koronavirýsqa shaldyqqandardyń jalpy sany 1341-ge jetti. Onyń ishinde elordada – 5, Soltústik Qazaqstan oblysynda – 1, Shymkent qalasynda – 3 jáne Batys Qazaqstan oblysynda 5 jaǵdai jańadan tirkeldi.
Soltústik Qazaqstan oblysynda indet Mamliýt aýdany Mamliýtka qalasynyń 52 jastaǵy turǵynynan anyqtaldy. Ol 15 sáýirde Resei Federatsiiasynan kelgen.
«Naýqas shetelden kelgenine bailanysty karantindik statsionarǵa buǵan deiin jatqyzylǵan bolatyn. Analizder alyndy. PTR zertteý nátijeleri boiynsha COVID-19 diagnozy qoiyldy. Ol Birinshi qalalyq aýrýhananyń juqpaly bólimine jatqyzyldy», - delingen aqparatta.
Nur-Sultan qalasynda 31 jastaǵy áiel, 26 jastaǵy - eki jáne 25 jastaǵy bir qyz infektsiia juqtyrdy. «Barlyǵy da naýqas adamdarmen bailanysta bolǵan. 37 jastaǵy taǵy bir áiel tekseris barysynda anyqtaldy. Olarmen bailanysta bolǵan adamdardy izdeý júrgizilýde», - delingen resmi málimette.
Shymkentte jańadan tirkelgen 3 naýqastyń barlyǵy qala turǵyndary. «Testileý kezinde KVI juqtyrý qaýpi joǵary meditsina qyzmetkerleriniń kontingenti anyqtaldy. PTR diagnostikalyq zertteý nátijeleri boiynsha diagnoz naqtylandy», - delingen taratylǵan aqparatta.
Al Batys Qazaqstan oblysynda 5 jaǵdai anyqtaldy. «Bir naýqas diagnozy buryn rastalǵan naýqastarmen birge RF-dan vahtadan keldi. Ekinshi patsient bailanysta bolǵandar qatarynan anyqtaldy. Qalǵan úsh naýqas RF-dan keldi. Olar «Tasqala«shekara beketinde RF-dan kelgenderge monitoring júrgizý barysynda anyqtaldy. Qazirgi ýaqytta barlyǵynyń jaǵdaiy - qanaǵattanarlyq. Bekitilgen hattamaǵa sáikes tiisti emdeý júrgiziledi. Olarmen bailanysta bolǵan adamdar anyqtalyp, meditsinalyq baqylaýǵa alyndy. Aýrý oshaqtarynda dezinfektsiialyq jumystar júrgiziledi», - delingen baspasóz habarlamasynda.
