Koronavirýs daǵdarysy jaǵdaiynda Ulttyq qordan transfertter tartýdyń ósýi boldy. Bul týraly Parlament Senatynyń jalpy otyrysynda Qarjy ministri Erulan Jamaýbaev aitty, dep habarlaidy QazAqparat.
«Esepti talqylaý kezinde biýdjettiń munaidan túsetin kiristerge táýeldiliginiń artýy týraly suraq qoiyldy. Shyn máninde, koronavirýs daǵdarysy jaǵdaiynda Ulttyq qordan tartylǵan transfert ósti, onyń kólemi biýdjet kiristeriniń 45 paiyzyna jetti», - dedi ministr QR Úkimetiniń 2020 jylǵy respýblikalyq biýdjettiń atqarylýy týraly esebin qaraý kezinde.
Onyń aitýnysha, qosymsha somany esepke almaǵanda, biýdjet kiristeriniń quramyndaǵy transfertterdiń úlesi ótken jyldar deńgeiinde saqtalady.
«Bul rette ótken jyly Ulttyq qordyń aktivteri 744 mlrd teńgege óskenin atap ótken jón. Qordy basqarýdan túsken investitsiialyq kiris 4,1 trln teńgeni qurady. Bul 2019 jylmen salystyrǵanda 2,5 esege kóp. Kepildendirgen transfert orta merzimdi kezeńde qysqaratyn bolady. Biýdjet kodeksine engizilgen túzetýlerge sáikes, kepildendirilgen transfert boiynsha jańa kontrtsikldyq qaǵidany qoldaný josparlanyp otyr», - dedi ministr.
Onyń sózine qaraǵanda, kepildendirilgen transfert munaidyń konservativtik baǵasy (kesimdi baǵa) kezinde munai sektorynan Ulttyq qorǵa túsetin túsimder kóleminen aspaityn mólsherde aiqyndalatyn bolady.
«Bul munaiǵa táýelsiz tapshylyqty tómendetýge jáne Ulttyq qordyń ósýine yqpal etedi. Eger ótken jyly respýblikalyq biýdjette munaiǵa qatysty emes túsimderdiń úlesi 55 paiyzdy qurasa, biyl onyń úlesi 64 paiyzǵa deiin jetedi. Aldaǵy kezeńde bul úlestiń mólsheri ulǵaiatyn bolady. Osyǵan orai «kóleńkeli» ekonomikany qysqartý, salyqtyq jáne kedendik ákimshilendirýdi tsifrlandyrý boiynsha keshendi jumystar júrgizilip jatyr», - dedi Jamaýbaev.
Budan buryn habarlanǵandai, Qarjy ministri 2020 jyly biýdjettiń basym baǵyttary tótenshe jaǵdai kezinde azamattardy jáne naqty sektordy qoldaýǵa arnalǵan shyǵystar bolǵanyn aitty.
