Tokio dárigerleri Olimpiada oiyndarynyń ótkizilýine qarsy shyǵýda. Germaniia murajailarǵa PTR-anyqtamamen kirgize bastady. Resei astanasynda koronavirýstyń jańa jaǵdailary azaidy, dep habarlaidy "Ult aqparat".
Tokiodaǵy 6 myńǵa jýyq dáriger qaladaǵy koronavirýstyń tórtinshi tolqynyna bailanysty Olimpiada oiyndaryn ótkizbeýge shaqyrdy. Osydan bir apta buryn japondyq klinikalardyń dárigerler toby Olimpiadany qaýipsiz ótkizý múmkin emestigin málimdedi. Japoniia turǵyndarynyń basym bóligi de bul sharany keiinge qaldyrýdy jaqtady. Eldegi 47 prefektýranyń 9-ynda tótenshe jaǵdai mamyr aiynyń sońyna deiin jariialandy. 125 millionnan astam japondyqtyń tek úsh paiyzy ǵana vaktsinatsiianyń birinshi dozasyn aldy, aýrýhanalar tolyp, dárigerler júktemesi arta tústi.
Berlindegi memlekettik murajailar 21 mamyrdan bastap kópshilikke esigin qaita aiqara ashatyndaryn málimdedi. Murajailarǵa kirýge PTR test jáne sol kúni alynǵan ekspress-testiń teris nátijesi bolǵanda, sondai-aq FFP2 qorǵanys maskasy jáne aldyn ala brondalǵan ýaqytqa bilet alynǵan kezde ǵana ruqsat beriledi.
Ispaniiada júrgizilgen Combivacs zertteýinen keiin anyqtalǵandai, Astrazeneca vaktsinasynyń birinshi dozasynan keiin Biontech/Pfizer vaktsinasynyń ekinshi dozasyn alý qaýipsiz jáne tiimdi. Ǵalymdar Astrazeneca preparatynyń eki dozasyn alǵandarda immýndyq jaýap 30-40 ese joǵary ekenin tirkedi. Sonymen qatar zertteýge qatysqan 600 adamnyń tek biren-saranynda eleýli janama áserler baiqalǵan. Birqatar eldiń biligi tromboz qaýpiniń joǵarylaýyna bailanysty Astrazeneca preparatyn Biontech/Pfizer nemese Moderna vaktsinasymen biriktirýdi usynady. Germaniiada bul 60 jasqa deiingi turǵyndarǵa qatysty júzege asyrylady.
Resmi málimetterge sáikes Máskeýdegi COVID-19 boiynsha kúndelikti aýrýshańdyq kórsetkishi 2430 jaǵdaiǵa deiin tómendegen. Bul bir kún burynǵy málimetke qaraǵanda 1 myń adamǵa az, dep habarlady Koronavirýs ahýalyn baqylaý jónindegi jedel shtab. Aita ketý kerek, bul 6 mamyrdan bastap tirkelgen Máskeýdegi eń tómengi kórsetkish.
