Batys Qazaqstan oblysynda sońǵy tirkelgen 6 turǵynnyń beseýi – Reseide jumys isteitinder, dep habarlaidy "Ult aqparat".
Búgin tańǵy 09.30-daǵy málimet boiynsha Batys Qazaqstan oblysynda 6 adamnyń koronavirýs juqtyrǵany belgili boldy.
Memlekettik komissiianyń shuǵyl shtabynan alynǵan málimetke qaraǵanda, sonyń beseýi – Reseide vahtalyq ádispen jumys jasaityn azamattar, bulardyń úsheýi – BQO-nyń, ekeýi – Túrkistan oblysynyń azamattary.
Saratov oblysymen shektesetin «Tasqala» avtoótkelinen ótken kezde olardyń densaýlyǵyna shaǵymy bolmaǵanmen, karantindik statsionarǵa jatqyzyldy. Zerthanalyq synama alynǵanda, koronavirýsqa shaldyqqany anyqtaldy.
Taǵy bir adam – Oral qalasynyń 54 jastaǵy turǵyny. Ol buryn aýyrǵan adammen qarym-qatynasta bolǵandyqtan, karantindik statsionarǵa jatqyzylyp, synama alynǵan.
Qazirgi tańda altaýy da oblystyq juqpaly aýrýlar aýrýhanasynda em alýda.
Osylaisha oblysta aýyrǵandar sany 92-ge jetip, sonyń ekeýi jazylyp shyqty. Bulardyń 78-i – Reseiden kelgender.
