Resmi málimet boiynsha, koronavirýs tabylmaǵan Tájikstanda mektepter eki aptaǵa jabylyp, qoǵamdyq sharalarǵa tyiym salyndy, astyq eksporty toqtatyldy. Bilik muny "profilaktikalyq sharalar" dep túsindirdi.
"Qoǵam densaýlyǵy jáne halyqtyń qaýipsizdigin qorǵaý maqsatynda, ásirese mektepke deiingi, orta bilim jáne kásiptik bilim berý uiymdaryndaǵy balalar men jasóspirimderdi qorǵaý úshin 2020 jyldyń 27 sáýir men 10 mamyr aralyǵynda ýaqytsha demalys jariialandy" delingen bilik habarlamasynda.
Bilim ministrliginiń tapsyrmasy boiynsha, ýniversitetter ashyq bolady.
Úkimettiń aitýynsha, eldiń azyq-túlik qaýipsizdigin nyǵaitý maqsatynda astyq jáne burshaq eksporty toqtatylǵan.
Tájikstan byltyr jeltoqsan aiynda koronavirýs taraǵan Qytaimen shekaralas. Nebári birneshe aidyń ishinde Qytaidyń Ýhan qalasynan taraǵan virýs álemge jaiylyp, indetke ainaldy. Sońǵy málimet boiynsha, koronavirýs juqtyrǵandar sany 2,8 mln adamǵa jetken. 200 myńnan astam adam qaitys bolǵan. 830 myńnan astam adam jazylǵan.
Al Tájikstanda resmi túrde koronavirýs tabylmaǵan. Qoǵamda bilik infektsiianyń baryn jasyrady dep esepteitinder de bar. Keibir sarapshylardyń pikirinshe, koronavirýstyń tabylmaýy virýsty anyqtaýǵa shamasy jetpeitin densaýlyq saqtaý júiesiniń qaýqarsyzdyǵyn da kórsetýi múmkin.
