Qazaqstan epidemiologiialyq jaǵdaidy baǵalaýdyń qosymsha ólshemsharttaryn engizdi. Bul týraly Úkimet otyrysynda QR Densaýlyq saqtaý ministriniń mindetin atqarýshy Lázzat Aqtaeva aitty, dep habarlaidy QazAqparat.
«Osy aptanyń 3 kúninde jaǵdai qolaisyz bolyp sipattalady. Osy aptanyń 3 kúnin ótken aptanyń osyndai kezeńimen salystyrǵanda ósim 1,6 ese bolyp otyr. Bul rette, 15 óńirde aýrýdyń 1,2 eseden 6 esege deiin óskeni baiqalady»,- dedi L.Aqtaeva.
Onyń atap ótýinshe, jaǵdaidy obektivti baǵalaý maqsatynda Densaýlyq saqtaý ministrligi epidemiologiialyq ahýaldy baǵalaýdyń qosymsha ólshemsharttaryn engizdi.
«Birinshiden, epidemiologiialyq jaǵdaidyń dinamikasy nazarǵa alynady. Bul jerde biz buryn paidalanylǵan «ósý qarqyny» degen kórsetkishten arylamyz. Sebebi jalpy aýrý jaǵdailarynyń sany belsendi aýyratyn naýqastardyń sanynan ózgeshe bolǵan jaǵdaida, bul kórsetkish epidemiianyń damý qarqynyn tolyq kólemde kórsetpeidi. Biz jaǵdaidy baǵalaý úshin R – reprodýktivti san kórsetkishin qoldanamyz. Iaǵni koronavirýs infektsiiasyna shaldyqqan 1 naýqas ortasha eseppen aýrý juqtyratyn bailanysta bolǵan adamdardyń sany», - dedi ministr mindetin atqarýshy.
Ekinshiden, onyń aitýynsha, shekteý sharalary mindetteriniń biri naýqastar aǵynyna shamasy kelmeitin kezde densaýlyq saqtaý júiesiniń shamadan tys júktelýine jol bermeý bolyp tabylady. Sondyqtan ekinshi ólshemshart koronavirýs infektsiiasymen aýyratyn naýqastarǵa arnalǵan bos emes tósek qorynyń kórsetkishi sanalady.
«Sondai-aq, biz qosymsha kórsetkishterdi de eskeremiz. Bul - KVI-den bolatyn ólim-jitim kórsetkishiniń ósýi, aýyr jáne óte aýyr dárejedegi naýqastardyń úlesi. Eger R kórsetkishi 1,3-ten asatyn bolsa ne ol 1,15-ten 1,3-ke deiingi diapazonda bolsa, bul rette bos emes tósekter 70 paiyzdan artyq bolsa ne bos emes tósekterdiń paiyzy reprodýktivtik sanǵa qaramastan 90 paiyzdan joǵary bolsa, karantindik jáne shekteý sharalaryn kúsheitý qajet», - dedi ol.
Lázzat Aqtaevanyń aitýynsha, Batys Qazaqstan, Qostanai jáne Mańǵystaý oblystary shekteý sharalaryn burynǵy kólemde qaldyrylýy múmkin. Búgingi kúni qosymsha qatańdatý sharalary barlyq 16 óńirde engizildi.
