Koronavirýsty anyqtaý testi oń nátije kórsetken kezde úreige boi aldyrýdyń qajeti joq. Bul jaiynda Qazaqstannyń jeteshki infektsionist dárigeri Danagúl Baesheva aitty, dep habarlaidy QazAqparat.
«Aýrýǵa shaldyqqandardyń 80 paiyzynda indettiń jeńil ári simptomsyz formasy bolady. Adamdardyń kópshiligi PTR-test oń nátije kórsetken jaǵdaida úreige boi aldyryp jatady. Munan qorqýdyń esh qajeti joq», - dedi Qazaqstannyń jetekshi infektsionisi Ortalyq kommýnikatsiialar qyzmetindegi brifing barysynda.
Onyń atap ótýinshe, dene qyzýy syndy alǵashqy belgileri paida bolǵan kezde de qorqýdyń esh qajeti joq.
«Sabyrlyq saqtaý kerek. Óitkeni, ózińiz de syrqattaný artyp kele jatqanyn kórip otyrsyz. Qazirgi ýaqytta úreige boi aldyryp, dúrbeleń týdyrýǵa bolmaidy. Qalai degenmen de táýekel tobyndaǵy adamdarǵa barynsha nazar aýdarǵan jón. Bul topqa sozylmaly aýrýlary bar egde jastaǵy adamdar kiredi», - dedi Danagúl Baesheva.
