Astana meditsina ýniversiteti Profilaktikalyq meditsina jáne nýtritsiologiia kafedrasynyń dotsenti Roza Súleimenova koronavirýs júqtyrmas úshin immýnitetti qalai nyǵaitýǵa bolatynyn aityp berdi, dep habarlaidy QazAqparat.
Dárigerdiń aitýynsha, indettiń taralýyn ýshyqtyrmas úshin profilaktikalyq sharalar nazarda bolýy kere. Turǵyndar kóbine dúken men dárihanaǵa baraldy. Bul nysandarda keide kezek bolyp jatady. Sondyqtan ara qashyqty saqtaýǵa mán bergen mańyzdy bolyp tur. Úiden shyqqanda meditsinalyq maskany taǵyp, arnaiy qolǵap kiip, qolǵa antiseptik alý qajet. Úige kirgen boida qolymyzdy sabynmen jýamyz. Munymen qosa, bólmeni kúnine kemine birneshe ret jeldetken jón, sondai-aq ylǵaldy tazalyq sharalaryn júrgizýge kerek.
«Óz betińizshe emdelmei, áýeli emhanadaǵy ýchaskelik dárigermen nemese jedel járdemge habarlasyp, sondaǵy mamandarmen aqyldasýǵa shaqyramyn. Basyńyz aýyryp, qurǵaq jótel, entigý paida bolsa, dene qyzýy kóterilip, iis sezýden aiyrylsańyz, álsizdik pen tersheńdik sezinseńiz, birden mamandarmen keńesip, em alyńyz», - dep túsindirdi Roza Súleimenova.
Dárigerdiń sózine qaraǵanda, koronavirýs taqyryby ózekti bolyp turǵan kezde immýnitetti kóterý máselesine qoǵam erekshe nazar aýdaryp otyr. Osy oraida ol qandai taǵamdardy jeý kerektigin aitty.
«Eń bastysy – immýnitetti álsiretpei, durys tamaqtaný kerek. Immýnitetti kóterý taqyrybyna toqtalsaq, aqýyzy kóp taǵamdardy alý kerek. Olarǵa balyq, taýyq, iri qara, sonyń ishinde jylqy eti jatady. Osylardyń sorpasynyń quramynda aqýyz kóp. Sol sebepti bul taǵamdardy mindetti túrde eskergen mańyzdy. Sonymen qatar, túrli jańǵaqty alý kerek. Immýnitetti kóterý úshin 30-40 paiyzyn aqýyzdan qurasaq, qalǵan 50-60 paiyzyn kókónis pen jemis-jidek arqyly qamtyǵan durys bolady», - dedi maman.
Bular tabiǵi ónim bolǵandyqtan, S vitamininiń kózi. Atap aitqanda, suiyqty kóp ishken abzal. Kúnine 3-5 litrge deiin sý, kompot jáne mors ishýge bolady.
Budan bólek, adamnyń kóńil-kúii immýnitetti kóterýge erekshe áser etedi. Kúizeliske túspegen durys. Eger kóńil-kúiimiz jaqsy bolyp, jigerlenip júrsek, immýnitet te jaqsy kóteriledi.
«Sary ýaiymǵa salynyp júrse, immýnitet te álsireidi. Sondyqtan únemi jaqsylyqtan úmit etý kerek. Eshqashan baibalam salmai, ýaiymdamai, barynsha sabyr saqtaǵan jón. Immýndyq júie osyǵan tikelei bailanysty», - dedi Roza Súleimenova.
