QR Indýstriia jáne infraqurylymdyq damý vitse-ministri Berik Qamaliev Qazaqstanǵa keletin jolaýshylardyń tasymalyn shekteý boiynsha jańa sharalardyń engiziletinin málim etti, dep habarlaidy "Ult aqparat".
«Osyǵan deiin habarlaǵanymyzdai, Qazaqstan men Qytai arasyndaǵy barlyq turaqty reis 2020 jyldyń 3 aqpanynan bastap toqtatylǵan edi. Mahan-Eir áýe kompaniiasynyń Almaty – Tegeran baǵdary boiynsha reisteri toqtatyldy. Almaty - Baký jáne Aqtaý – Baký baǵdary boiynsha Ázerbaijanmen arada aptasyna 15 reis bar bolatyn. Biz Almaty – Baký reisin 5-ten 1 reiske deiin, al Aqtaý – Baký reisterin 7-den 1-ge deiin qysqarttyq», - dedi Berik Qamaliev OKQ-da ótken baspasóz máslihatynda.
Vitse-ministr bul sheshimdi Úkimet janyndaǵy vedomstvoaralyq komissiia qabyldaǵanyn eske saldy.
«1 naýryzdan bastap biz Nur-Sultan men Seýl arasyndaǵy áýe reisterin 9-dan 3-ke deiin azaittyq. Bul reisterdi «Eir Astana» men ońtústikkoreialyq «Asiana» áýe kompaniiasy oryndap kelgen. Komissiia sonymen birge 8 naýryzdan bastap Ońtústik Koreianyń azamattary men 1 sanattaǵy elder azamattarynyń elge kirýin shekteý týraly sheshim qabyldady. Osyǵan bailanysty Seýl - Almaty jáne Seýl - Nur-Sultan baǵdary boiynsha saparǵa jaýapty áýe kompaniialardyń bárine búgin radiogramma jiberdik», - dedi vitse-ministr.
Sonymen qatar, 8 naýryzdan bastap tranzittik jolaýshylardyń kirýine de shekteý engiziletinin málim etti.
«Bizdiń keibir azamat úshinshi el arqyly elge keledi. Úshinshi el arqyly basqa elderden keletin tranzittik jolaýshylar da bar. Sol sebepti biz basqa áýe kompaniialaryn eskertip, 1 sanatqa kiretin elderdiń azamattary Qazaqstanǵa 8 naýryzdan bastap kire almaitynyn eskertip jatyrmyz», - dedi Berik Qamaliev.
