14 naýryz Qazaqstannyń batys óńirlerinde, sondai-aq Reseidiń shekaralas aimaqtarynda Kórisý kúni retinde atalyp ótiledi. Osyǵan orai Jáńgir han atyndaǵy tarihi-etnografiialyq mýzeiiniń meńgerýshisi, «Úzdik ólketanýshy» tósbelgisiniń iegeri Nurjan Tólepov óz oi-tolǵamymen bólisti, dep habarlaidy QazAqparat.
Onyń aitýynsha, Kórisý – qazaqtyń ejelden kele jatqan saltynyń biri.
Qystai úilerinen shyqpaǵan qazaqtar kóktem shyǵa bir-birimen amandasyp, qushaqtasa kórisken. Bul – ásirese, jasy úlkenderdi syilaýdyń erekshe bir kórinisi.
- Biz kishkentaiymyzdan osy kúndi asyǵa kútetin edik. Erteń Kórisý kúni, uiyqtap qalmaý kerek, oiatyńdar dep aldymyzǵa kádimgidei maqsat qoiyp, daiyndalatynbyz. Áli esimde, ótken ǵasyrdyń alpysynshy jyldary bul kúndi airyqsha qarsy alatynbyz. Qazir oilap qarasam, balalar úshin aitarlyqtai meiram edi. Sebebi qushaq jaiyp, jasy úlken ata-ájeler sálemimizge batasyn berip, aldymyzǵa baryn tosatyn. Qolymyz ýys-ýys baýyrsaqqa, qaltamyz táttige tolatyn, - deidi Nurjan Joldyǵaliuly.
Onyń sózine qaraǵanda, aldymen áýlettiń úlkeni ákesiniń aǵasyna baryp, kórisedi eken. Ózi mama dep ataityn ájesi de sol úide. Ájesiniń meiirimine bólenip, erkelep, qasynda kóbirek bolady. Netken ystyq sátter! Degenmen bir tyǵyz sharýa qalyp qoiǵandai, salmaqty sóilep, ózinshe eseiip qalady. Rasynda jaýapkershilikti sezinetin bolyp tur ǵoi. Ózderin qamshylap, júitkip júrip, túske deiin aǵaiyn-týma, kórshilerdi aralap shyǵady. Ýaqytynda aralap úlgermese, ókinishte qalatyndai kórinetin.
«Úige kirgende, úlken is tyńdyrǵandai, kiresiń ǵoi. Otbasy jinalǵan dastarhan basynda gý-gý áńgime. Kórgendi, estigendi aitasyń. Ata-anań da qoldap, maqtaǵan saiyn qanattanasyń. Sóitip kórisý kún de ótedi, kelesi jylǵa jospar quryp jatqanda uiyqtap ketesin. Biraq esimde qalǵany naýryz, naýryz kóje dep aitylmaityn edi. Bar biletinimiz, baiaǵy naýryz aiynyń on tórti – Kórisý kúni! Eń bastysy, bul kúnniń balalar úshin tárbielik máni erekshe ekendigin osydan-aq kórýge bolady. Solai úzilgendi jalǵap, tól merekemizdi toilaýǵa da jettik qoi. Birtutas elmiz, sondyqtan shyǵys, batysqa bólinbei, bir arnaǵa toǵysqan tarihymyz ben salt-dástúrimiz qaita túlei berýi kerek. Kórisý kúni – barshamyzǵa ortaq kún, ortaq mereke deýge bolady», - dep túiindedi oiyn Tólepov.
