14 ناۋرىز قازاقستاننىڭ باتىس ٶڭٸرلەرٸندە, سونداي-اق رەسەيدٸڭ شەكارالاس ايماقتارىندا كٶرٸسۋ كٷنٸ رەتٸندە اتالىپ ٶتٸلەدٸ. وسىعان وراي جەڭگٸر حان اتىنداعى تاريحي-ەتنوگرافييالىق مۋزەيٸنٸڭ مەڭگەرۋشٸسٸ, «ٷزدٸك ٶلكەتانۋشى» تٶسبەلگٸسٸنٸڭ يەگەرٸ نۇرجان تٶلەپوۆ ٶز وي-تولعامىمەن بٶلٸستٸ, دەپ حابارلايدى قازاقپارات.
ونىڭ ايتۋىنشا, كٶرٸسۋ – قازاقتىڭ ەجەلدەن كەلە جاتقان سالتىنىڭ بٸرٸ.
قىستاي ٷيلەرٸنەن شىقپاعان قازاقتار كٶكتەم شىعا بٸر-بٸرٸمەن امانداسىپ, قۇشاقتاسا كٶرٸسكەن. بۇل – ەسٸرەسە, جاسى ٷلكەندەردٸ سىيلاۋدىڭ ەرەكشە بٸر كٶرٸنٸسٸ.
- بٸز كٸشكەنتايىمىزدان وسى كٷندٸ اسىعا كٷتەتٸن ەدٸك. ەرتەڭ كٶرٸسۋ كٷنٸ, ۇيىقتاپ قالماۋ كەرەك, وياتىڭدار دەپ الدىمىزعا كەدٸمگٸدەي ماقسات قويىپ, دايىندالاتىنبىز. ەلٸ ەسٸمدە, ٶتكەن عاسىردىڭ الپىسىنشى جىلدارى بۇل كٷندٸ ايرىقشا قارسى الاتىنبىز. قازٸر ويلاپ قاراسام, بالالار ٷشٸن ايتارلىقتاي مەيرام ەدٸ. سەبەبٸ قۇشاق جايىپ, جاسى ٷلكەن اتا-ەجەلەر سەلەمٸمٸزگە باتاسىن بەرٸپ, الدىمىزعا بارىن توساتىن. قولىمىز ۋىس-ۋىس باۋىرساققا, قالتامىز تەتتٸگە تولاتىن, - دەيدٸ نۇرجان جولدىعاليۇلى.
ونىڭ سٶزٸنە قاراعاندا, الدىمەن ەۋلەتتٸڭ ٷلكەنٸ ەكەسٸنٸڭ اعاسىنا بارىپ, كٶرٸسەدٸ ەكەن. ٶزٸ ماما دەپ اتايتىن ەجەسٸ دە سول ٷيدە. ەجەسٸنٸڭ مەيٸرٸمٸنە بٶلەنٸپ, ەركەلەپ, قاسىندا كٶبٸرەك بولادى. نەتكەن ىستىق سەتتەر! دەگەنمەن بٸر تىعىز شارۋا قالىپ قويعانداي, سالماقتى سٶيلەپ, ٶزٸنشە ەسەيٸپ قالادى. راسىندا جاۋاپكەرشٸلٸكتٸ سەزٸنەتٸن بولىپ تۇر عوي. ٶزدەرٸن قامشىلاپ, جٷيتكٸپ جٷرٸپ, تٷسكە دەيٸن اعايىن-تۋما, كٶرشٸلەردٸ ارالاپ شىعادى. ۋاقىتىندا ارالاپ ٷلگەرمەسە, ٶكٸنٸشتە قالاتىنداي كٶرٸنەتٸن.
«ٷيگە كٸرگەندە, ٷلكەن ٸس تىڭدىرعانداي, كٸرەسٸڭ عوي. وتباسى جينالعان داستارحان باسىندا گۋ-گۋ ەڭگٸمە. كٶرگەندٸ, ەستٸگەندٸ ايتاسىڭ. اتا-اناڭ دا قولداپ, ماقتاعان سايىن قاناتتاناسىڭ. سٶيتٸپ كٶرٸسۋ كٷن دە ٶتەدٸ, كەلەسٸ جىلعا جوسپار قۇرىپ جاتقاندا ۇيىقتاپ كەتەسٸن. بٸراق ەسٸمدە قالعانى ناۋرىز, ناۋرىز كٶجە دەپ ايتىلمايتىن ەدٸ. بار بٸلەتٸنٸمٸز, باياعى ناۋرىز ايىنىڭ ون تٶرتٸ – كٶرٸسۋ كٷنٸ! ەڭ باستىسى, بۇل كٷننٸڭ بالالار ٷشٸن تەربيەلٸك مەنٸ ەرەكشە ەكەندٸگٸن وسىدان-اق كٶرۋگە بولادى. سولاي ٷزٸلگەندٸ جالعاپ, تٶل مەرەكەمٸزدٸ تويلاۋعا دا جەتتٸك قوي. بٸرتۇتاس ەلمٸز, سوندىقتان شىعىس, باتىسقا بٶلٸنبەي, بٸر ارناعا توعىسقان تاريحىمىز بەن سالت-دەستٷرٸمٸز قايتا تٷلەي بەرۋٸ كەرەك. كٶرٸسۋ كٷنٸ – بارشامىزعا ورتاق كٷن, ورتاق مەرەكە دەۋگە بولادى», - دەپ تٷيٸندەدٸ ويىن تٶلەپوۆ.
