Foto: Gov.kz
Premer-ministr Oljas Bektenov Skyhansa kompaniiasynyń negizin qalaýshy Kristin Griottsbahpen kezdesý ótkizip, Jetisý oblysyndaǵy «Qorǵas» shekara mańy yntymaqtastyǵy halyqaralyq ortalyǵy mańynda júk jáne jolaýshylar áýejaiyn salý jobasyn júzege asyrý máseleleri talqylady, dep habarlaidy Ult.kz.
«Qorǵas-Shyǵys qaqpasy» AEA-daǵy halyqaralyq júk jáne jolaýshylar áýejaiynyń jobasy ICAO halyqaralyq usynymdaryna sáikes aviatsiialyq infraqurylym salýdyń úsh kezeńdi baǵdarlamasyn kózdeidi.
Birinshi kezeń sheńberinde 2027 jylǵa deiin:
- - ótkizý múmkindigi saǵatyna 50 adamǵa deiin jolaýshylar terminalyn (2032 jylǵa qarai – saǵatyna 500 adamǵa deiin);
- - JET A-1 aviaotyny jańa túriniń zamanaýi otyn qoimasynyń kólemi jylyna 200 myń tonnaǵa deiin (2032 jylǵa qarai – 550 myń tonnaǵa deiin);
- - avtoturaǵy jáne jylyna 50 myń tonna temirjol tuiyǵy bar júk terminalyn (2032 jylǵa qarai – jylyna 250 myń tonnaǵa deiin) salý josparlanýda.
Ekinshi jáne úshinshi kezeńder sheńberinde 2032 jylǵa deiin týristik jáne oiyn-saýyq infraqurylymy da qurylady. Investitsiialardyń jalpy kólemi shamamen 250 mlrd teńgeni quraidy.
Sondai-aq jobada Air–Rail–Auto-Air júk tasymaldarynyń mýltimodaldy syzbasyn ázirleý jáne Aziia-Tynyq muhity aimaǵy baǵytyndaǵy kólik jáne logistikalyq marshrýttardyń túiisken jerinde ekonomikalyq ósýdiń jańa múmkindikterin ashý kózdelgen.
Kezdesý sońynda QR Kólik ministrligi men Skyhansa arasynda Investitsiialar týraly kelisimge qol qoiyldy. Qujatqa sáikes, investor qajetti aviatsiialyq infraqurylym qurylysyn, negizinen otandyq materialdar men qyzmetterdi paidalanýdy, sondai-aq jobany júzege asyrýǵa qyzmetkerlerdiń keminde 90%-y Qazaqstan azamattary bolýyn qamtamasyz etýge mindetteledi. Qazaqstandyq tarap injenerlik jáne kólik infraqurylymyn tartyp, sondai-aq arnaiy ekonomikalyq aimaqqa qatysýshylarǵa maqsatty jeńildikter beredi.
