Pákistan Islam Respýblikasy Qarýly Kúshteri Shtabtar bastyqtary birikken komitetiniń tóraǵasy general Nadim Raza Qazaqstanǵa resmi saparmen keldi, dep habarlaidy "Ult aqparat" QR Qorǵanys ministrliginiń baspasóz qyzmetine silteme jasap.
Qorǵanys vedomstvosynda general Nadim Razany Qazaqstan Respýblikasynyń Qorǵanys ministri general-leitenant Nurlan Ermekbaev qabyldady.
Keńeitilgen quramda general Nadim Razamen Qorǵanys ministriniń birinshi orynbasary – Bas shtab bastyǵy general-leitenant Murat Bektanov ta kezdesti.
Kezdesý barysynda Qazaqstan men Pákistan arasyndaǵy áskeri yntymaqtastyqtyń ózekti máseleleri talqylandy. Atap aitqanda, jaýyngerlik daiarlyq, áskeri bilim berý jáne kadrlar daiarlaý, BUU missiialarynda bitimgershilik kontingentin birlesip óristetý salasyndaǵy ózara is-qimyl máseleleri qozǵaldy.
Jumys sapary sheńberinde general Nadim Razanyń Qazaqstan Respýblikasynyń Tuńǵysh Prezidenti – Elbasy atyndaǵy Ulttyq qorǵanys ýniversitetine barýy josparlanyp otyr.
