QR Qorǵanys ministrligi UQShU elderiniń áskeri kontingentteri Qazaqstanda qandai tapsyrmalardy oryndap jatqanyn málim etti, dep habarlaidy QazAqparat.
Vedomstvo aqparatyna súiensek, alǵashqy bolyp Qazaqstanǵa 6 qańtar kúni Reseidiń áskeri kontingenti bar ushaq kelip qondy. Izin sýytpai artynan jedel túrde Armeniia, Belarýs, Qyrǵyzstan jáne Tájikstannan bitimgerlik kontingentter jetken. Bitimgerlik kúshterdiń jalpy sany shamamen 2500 adamdy quraidy.
Almatyda tótenshe jaǵdai sharalaryn qamtamasyz etýge qatysatyn Uiymnyń bólimderi men bólimsheleriniń is-qimylyn úilestiretin UQShU-nyń Ujymdyq bitimgerlik kúshteri shtaby quryldy.
«Elimizde kontingentti ornalastyrý úshin Ujymdyq qaýipsizdik týraly sharttyń 2 jáne 4-baptary, Bitimgershilik qyzmet týraly kelisim jáne Qazaqstan Respýblikasy Prezidentiniń tiisti kómek kórsetý týraly úndeýi quqyqtyq negiz bolyp tabylady.
Bitimgershilik kúshterdiń mandatyna strategiialyq nysandardy kúzetý kiredi. Kontingentter áýejailardy, áskeri qoimalardy jáne halyqtyń tynys-tirshiligin qamtamasyz etetin basqa da strategiialyq nysandardyń qaýipsizdigin qamtamasyz etý fýnktsiialaryn júzege asyrady.
UQShU-ǵa múshe memleketter ujymdyq bitimgershilik kúshteriniń áskeri qyzmetshileri terrorizmge qarsy operatsiiaǵa tartylmaidy. Terroristik toptarǵa qarsy negizgi is-qimyldardy quqyq qorǵaý organdary men Qazaqstan Respýblikasynyń Qarýly Kúshteri júrgizedi. Sonymen qatar elde Uiym elderiniń áskeri bólimsheleriniń bolýy Qazaqstan Qarýly Kúshteriniń áskeri qyzmetshileri men basqa da áleýetti qurylymdardyń qyzmetkerlerine tótenshe jaǵdai rejimin qamtamasyz etý jáne terrorizmge qarsy operatsiiany ótkizý jónindegi is-sharalarǵa tolyq kóńil aýdarýǵa múmkindik berdi», - dedi QR Qorǵanys ministrliginen.
Eske salaiyq, QR Prezidenti Qasym-Jomart Toqaev Ujymdyq qaýipsizdik shart uiymyna múshe elderdiń basshylarynan el aýmaǵyndaǵy terroristik qaýipti eńserý úshin Qazaqstanǵa kómek kórsetýdi suraǵan bolatyn.
«UQShU-nyń Ujymdyq bitimgershilik kúshteri Qazaqstan aýmaǵynda ýaqytsha merzimge kelgenin jáne Qazaqstan tarapynyń ótinishi boiynsha jaǵdai turaqtalǵannan keiin elden ketetinin atap ótý qajet», - dedi qorǵanys vedomstvosynan.
Aita keteiik, UQShU-ǵa múshe memleketterdiń bitimgershilik kontingentteri – bul arnaiy daiyndalǵan áskeri, militsiia (politsiia) jáne azamattyq personal, sondai-aq Uiymǵa múshe memleketter UQShU-nyń bitimgershilik kúshterine beretin kúshter men quraldar. Ujymdyq bitimgershilik kúshterdiń quramy, qurylymy men sany júktelgen mindetterdiń kólemi men shielenis aimaǵyndaǵy naqty jaǵdaidy negizge ala otyryp, árbir bitimgershilik operatsiia úshin UQShU Ujymdyq Qaýipsizdik keńesiniń sheshimimen jeke aiqyndalady.
