Qazaqstanda merzimdi áskeri qyzmetti óteý merzimi ózgermeidi.
Bul týraly Ortalyq kommýnikatsiialar qyzmetinde ótken interaktivti dáris barysynda Qorǵanys ministriniń orynbasary general-maior Talǵat Muhtarov málim etti.
«El ishinde áskeri qyzmet 1 jyldan 2 jylǵa uzartylady degen aqparat tarady. Biraq zań júzinde bir jyldyq ýaqyt belgilengendikten merzimdi áskeri qyzmetti óteý ýaqyty ózgerissiz qalady. Boryshyn óteý úshin shaqyrylǵan sarbazdarǵa áskeri ádis-tásilderdi oqyp-úirenýge on eki ai jetkilikti dep oilaimyn. Biz olardy júrgizýshi, atqysh sekildi mańyzdy mamandyqtarǵa baýlyp, 1 jyldyń ishinde tolyq igerip shyǵýlaryna múmkindikter jasaimyz. Óitkeni bizdiń arnaiy áskeri okrýgterimizde mamandandyrylǵan oqý ortalyqtary jumys jasaidy. Kelgen jastar negizgi áskeri bólimge jetkenshe sol jerden jan-jaqty daiarlanyp, dáris alyp shyǵady», - dedi ol.
