QR Qorǵanys ministrligi Jambyl oblysy Otar aýylyndaǵy áskeri bólimde merzimdi qyzmetin ótep jatqan sarbazdyń komaǵa túsýine qatysty málimdeme jasady, dep habarlaidy "Ult aqparat".
"9 maýsymda Jambyl oblysynyń Qordai aýdandyq ortalyq aýrýhanasyna Gvardeisk garnizonynyń merzimdi qyzmettegi áskeri qyzmetshisi shuǵyl jatqyzyldy. Bastapqyda ózin álsiz sezinip, qyzýy kóterilgen sarbaz Gvardeisk garnizonyndaǵy áskeri gospitaldiń juqpaly aýrýlar bólimine jetkizilgen bolatyn. Meditsinalyq tekserýler men zertteýler áskeri qyzmetshiden ekijaqty polisegmentti pnevmoniia anyqtady. Naýqastyń jaǵdaiy aýyr dep baǵalanyp otyr. Qazir oǵan barlyq qajetti meditsinalyq kómek kórsetilýde. Sonymen birge ol jerde Qorǵanys ministrligi áskeri klinikalyq gospitaliniń quramyna anesteziolog, reanimatolog jáne terapevt dárigerler kiretin kóshpeli brigadasy jumys istep jatyr", - delingen habarlama.
Áskeri qyzmetshi emdeý mekemesine túsken kezde onyń denesinen kógergen nemese zaqymdaný izderi bolmaǵanyn atap ótý kerek. Merzimdi qyzmettegi sarbazǵa qatysty kelisimshart boiynsha áskeri qyzmetshi tarapynan bilikti asyra paidalaný faktisi boiynsha QR IIM Áskeri tergeý basqarmasy qylmystyq is qozǵady. Tekserý júrgizilip jatyr. Tergeý múddesi úshin basqa aqparattar jariia etilmeidi. Is Qorǵanys ministriniń erekshe baqylaýynda.
Aita keteiik, Prezident sarbazdyń komaǵa túsýine qatysty mán-jaidy zerttep, kináli adamdardy jazalaýdy talap etti.
Jambyl oblysynda sarbaz jansaqtaý bólimine túsken edi. Oqiǵa 9 maýsym kúni bolǵan. Jambyl oblystyq Densaýlyq saqtaý basqarmasy baspasóz qyzmeti sarbazdyń jaǵdaiy aýyr ekenin málimdedi.
"Naýqas 9 maýsym kúni Gvardeisk áskeri gospitalinen jedel járdem kóligimen jetkizildi. Qordai ortalyq aýdandyq aýrýhanasyna «polisegmentaldy pnevmoniia» diagnozymen jatqyzyldy. Oń jaqta plevrit. 3-4 dárejeli juqpaly toksikalyq shok. Sepsis. Midyń gipoksiialyq isinýi, tserebraldy koma 2-3. DVS sindromy. Naýqas klinikalyq ólimdi bastan keshken. Qazirgi ýaqytta naýqastyń jaǵdaiy óte aýyr, kóptegen músheler jetkiliksizdigi baiqalady. Atap aitqanda, tynys alý, júrek, baýyr, tserebraldy jáne infektsiialyq toksikalyq shok belgileri bar. Gemofiltratsiia jáne dári-dármekpen emdeledi", - delingen habarlamada.
