Foto: Aqorda
Qorǵanys ministrligi Astanadaǵy Ulttyq qorǵanys ýniversiteti aýmaǵynan Nursultan Nazarbaevtyń eskertkishi nege alyp tastalǵanyn túsindirdi, - dep habarlaidy Tengrinews.kz saity vedomstvo baspasóz qyzmetine silteme jasap.
Ministrlik buǵan deiin "QR Tuńǵysh Prezidenti – Elbasy atyndaǵy Ulttyq qorǵanys ýniversiteti" ataýy "QR Ulttyq qorǵanys ýniversiteti" bolyp ózgertilgenin eske saldy.
"Osyǵan bailanysty Ulttyq qorǵanys ýniversiteti aýmaǵynda ornalasqan QR Tuńǵysh Prezidenti eskertkishin Qazaqstan Respýblikasy Qarýly Kúshteri Memlekettik áskeri-tarihi murajaiynyń ǵimaratyna kóshirý jáne ornatý týraly sheshim qabyldandy", - delingen habarlamada.
Ministrlik málimetinshe, eskertkish qazir qorǵanys vedomstvosy ǵimaratynyń birinde ýaqytsha saqtaý qoimasynda tur. Daiyndyq sharalarynan keiin ol ornatý úshin murajai ǵimaratyna kóshiriledi.
