Foto: gov.kz
Qorǵanys ministri Rýslan Jaqsylyqov Taldyqorǵandaǵy áskeri-áýe bazasynda eki áskeri qyzmetker zardap shegip, bireýi qaza tapqan oqiǵaǵa qatysty pikir bildirdi, - dep habarlaidy Tengrinews.kz.
Ministrdiń aitýynsha, áýe bazasynda qaýipsizdik sharalaryn buzý saldarynan apat bolǵan. Bul rette, Jaqsylyqovtyń sózinshe, alǵan jaraqatynan qaza bolǵan ofitser tártipbuzýshylyqqa jol bergen.
"Tergeý áli jalǵasyp jatyr. Onyń nátijelerin habarlaimyz. Biraq, ókinishke qarai, ómirimizde qate áreketter qaitymsyz saldarǵa ákep soǵatyn jaǵdailar bar. Onyń ústine, áskeri qyzmet árqashan qaýippen bailanysty. Sondyqtan qaýipsizdik sharalaryn jeke jáne ujymdyq túrde saqtaýymyz kerek", - dep qosty ministr.
Sondai-aq Jaqsylyqov oqiǵanyń saldarynan ushaqtarǵa da, ǵimarattarǵa da zaqym kelmegenin aitty.
"Bul - ushaqtyń snariady. Ol durys paidalanylmai, snariad ushyp ketken", - dep túsindirdi Qorǵanys ministri.
