Foto: ashyq derekkóz
Búginde elimizde qorǵanshylyq organdarynyń mamandarynyń sany 3,3 esege, iaǵni 303-ten 1006-ǵa deiin artty, dep habarlaidy Ult.kz.
Bul otbasylarǵa kórsetiletin kómektiń aýqymyn keńeitýge, qoljetimdilikti arttyrýǵa jáne súiemeldeýdiń sapasyn jaqsartýǵa múmkindik beredi. Jyl sońyna deiin shtattyq quramdy 1383 adamǵa deiin ulǵaitý kózdelýde.
2024 jylǵy jeltoqsanda Qazaqstan Respýblikasynyń «Memlekettik nagradalar, bilim berý jáne bala quqyqtaryn qorǵaý týraly» Zańymen alǵash ret naqty norma bekitilgen bolatyn: endi árbir 5 myń balaǵa bir maman qarastyrylady.
Sondai-aq óńirlerde qorǵanshylyq organdarynyń jumysyn úilestiretin jańa qurylymdar qurylýda. Máselen, Aqtóbe oblysynda Balalardyń quqyqtaryn qorǵaý basqarmasy ashyldy. Aldaǵy ýaqytta osyndai bólimsheler Astana qalasynda jáne Qostanai oblysynda iske qosylady.
«Jańa shtattyq norma Qazaqstan úshin alǵash ret engizilip otyr jáne halyqaralyq standarttarǵa tolyq sáikes keledi. Bul jergilikti deńgeide týyndaityn máselelerdi jedel sheshýge, sondai-aq balalar men olardyń otbasylaryna ýaqtyly kómek kórsetýge múmkindik beredi», — dedi QR Oqý-aǵartý ministrligi Balalardyń quqyqtaryn qorǵaý komitetiniń tóraǵasy Nasymjan Ospanova.
Buǵan deiin Oqý-aǵartý ministrligi Bala quqyqtary jónindegi ýákiletti organmen birlesip qorǵanshylyq organdary qyzmetkerlerine arnalǵan seminar-trening ótkizgen bolatyn. Onyń qorytyndysy boiynsha mamandarǵa ádistemelik usynymdar berildi, búginde olar is júzinde qoldanys tabýda.
