Jambyl obylysynyń ákimi Berdibek Saparbaev Qordaidaǵy oqiǵadan keiin dúngenderdiń kóship jatqany týraly aqparatty joqqa shyǵardy, dep habarlaidy QazAqparat.
«Qazir Qordaidaǵy jaǵdai turaqty. Barlyq zalal orny toltyryldy. Tek biyl bir ǵana Qordai aýdanyna 35 mlrd teńge aqsha bólindi. Sonyń nátijesinde jańadan 4300 jumys oryny ashyldy. Qordai aýdanynyń kóptegen máseleleri, jol, aýyzsý problemasy sheshildi. Qordai aýdanynda halyqty gazben qamtamasyz etý deńgeii 95 paiyzǵa jetti. Jyldyń basynda 47 paiyz bolǵan. Kásipkerlik baǵytynda da ósim bar. Keibir baspasóz quralynda «dúngender basqa jaqqa kóship ketti, kásibin jalǵastyrýǵa kedergi jasap jatyr» degen aqparat tarap jatyr. Bárin zerttedik. Olar burynǵydai Qordai, Shý aýdanynda, kórshiles Almaty jáne Qaraǵandy oblystarynda jumys istep jatyr. Birde-bir dúngen Reseige nemese basqa memleketke kóship ketken joq», - dedi Jambyl obylysynyń ákimi Ortalyq kommýnikatsiialar qyzmetinde ótken baspasóz máslihatynda.
Ákimniń aitýynsha Qazaqstan úshin qazir eń keregi – barlyq ult ókilderiniń birligi.
«Ekinshiden, qazaq halqy asharshylyq bolsyn, soǵys nemese repressiia bolsyn bir úzim nanyn qasyndaǵylarǵa bólip bergen. Ol týraly Elbasynyń aitqanyn, bergen tapsyrmasyn bilesizder. «Qazaq halqyna myń alǵys» monýmentin ashtyq. Ol jerde tek biýdjettiń ǵana aqshasy jumsalǵan joq, kásipkerler de, demeýshiler de kómek kórsetti», - dedi ol.
