Jambyl oblysynyń prokýratýrasy qyz urlyǵy úshin 15 jylǵa deiin jaza kútip turǵanyn eske salady, dep habarlaidy "Ult aqparat" vedomstvonyń baspasóz qyzmetine silteme jasap.
Aita keteiik, taiaýda Qordai aýdandyq sotynyń úkimimen Túrkistan oblysynyń tórt turǵyny qyz urlaǵany úshin 7 jylǵa sottalǵan bolatyn. Al avtokólik qylmys quraly retinde tárkilenip, memleket kirisine alyndy.
Oqiǵa 2018 jyldyń kúzinde jigittiń Jambyl oblysy Qordai aýdanynda turatyn qyzben tanysýynan bastalǵan. Áleýmettik jelidegi tanystyqtan keiin jigit qyzdy alyp qashýdy oilastyra bastaidy.
«Uzaq oilanbastan ol úilený maqsatynda óziniń úsh tanysymen kelisip, Qordai aýdanyna avtokólikpen keledi. Kelgen soń uialy telefonǵa qońyraý shalyp, qyzǵa kezdesýdi usynady, biraq ol bas tartqan. Jastar qyzdyń úi jaǵynda kútip, ony kóshede qarsy alady. Qyzdyń qarsylyq kórsetip, bas tartýyna qaramastan, olar ony kólikke kúshtep salyp, Túrkistan oblysyna jol tartady. Alaida politsiia qyzmetkerleri olardy Taraz qalasynyń shyǵa berisinde ustady» delingen habarlamada.
Osyǵan bailanysty oblys prokýratýrasy qyz alyp qashý siiaqty oilanbai istegen is-áreket úshin 15 jylǵa deiin bas bostandyǵynan aiyrý jazasy kútip turǵanyn eske salady. Bul rette urlanǵan adamdy óz erkimen bosatqan adamnyń áreketinde ózge qylmys quramy bolmasa, qylmystyq jaýapkershilikten bosatylady.
