Búgin elimizdiń úsh óńirinde Qordai aýdanyndaǵy jappai tártipsizdikke belsene qatysqan 25 adam ustaldy.
Bul týraly búgin Ortalyq kommýnikatsiialar qyzmetindegi brifingte QR Bas Prokýrorynyń orynbasary Erlik Kenenbaev aitty, dep habarlaidy "Ult aqparat".
«Búgin Jambyl oblysynda, Almaty jáne Shymkent qalalarynda Qordai aýdanyndaǵy jappai tártipsizdikke belsendi qatysýshylardy ustaý boiynsha arnaiy operatsiia júrgizildi. Onyń nátijesinde 25 adam ustaldy. Olardyń ishinde qazaqtar, dúngender, qyrǵyzdar bar. Onyń 7-eýi buryn sottalǵan. Isti tergeý jalǵasýda jáne bizdiń erekshe baqylaýymyzda tur. Barlyq protsessýaldyq sheshimder zańnamaǵa sáikes qatań qabyldanýda. Jinalǵan dáleldemelerge tiianaqty taldaý júrgizip jatyrmyz. Jappai tártipsizdikke qatysýshylardyń árbiriniń róline baǵa berilýde», - dedi ol.
Osy rette Bas prokýrordyń orynbasary barlyq qazaqstandyqty qylmystyq istiń tergelýi barysy jaiynda tek resmi derek kózderine senýge shaqyrdy.
«Ártúrli arandatýshylarǵa ermeýlerińizdi suraimyn. Jalǵan málimetterdi taratýǵa jáne joldaýǵa jol bermeý qajet. Sot tóreligin júzege asyrýǵa jáne sotqa deiingi tergeý júrgizýge kedergi jasaǵany úshin QR Qylmystyq kodeksiniń 407-babymen qylmystyq jaýapkershilik kózdelgenin eskertemin. Búgin tolyq senimmen Qordaidaǵy jaǵdai turaqty dep aita alamyn», - dedi Erlik Kenenbaev.
